Shillong, Naiwieng 03: Wat hapdeng ki jingkylla ha ka sorkar bad ki rukom treikam jong ka, ka lawei jong ka Eklavya Model Residential Schools (EMRS) ha Meghalaya ka neh ha ka jingbym thikna, ha kaba tang 2 tylli na ki 38 tylli ki skul kiba la ïoh ka jingpynskhem, ha kaba kawei kawei ka dei ha ka jinglut kaba T. 24 klur, bad tang kine hi ki 2 tylli ba la lah ban pyndep.
Na ka liang ka Ministry of Tribal Affairs ka la mang kumba 38 tylli ki skul EMRS ki ban ai ka pule ka puthi kaba ym donkam siew pisa na ka bynta ki khynnah pule jong ki riewlum. Ha kawei ka liang ka jylla ka la lah ban pyndep ban tei tang ha ki artylli ki jaka kawei kadei ha Nongpoh, Ri-Bhoi, bad kawei pat kadei ha Samanda, ha East Garo Hills.
“Na ki 38 tylli ki skul, tang artylli la lah ban pyndep, bad katto katne pat ki dang don ha ka kyrdan ban sdang ïa ka jingtei. Hapdeng ki 22 haduh 25 ki dang don ha lynti ban sdang ïa ka jingtei, hynrei nga ngeit skhem ba kane ka kam kan sa sted noh ha kine ki sngi ban wan,” ong u Myntri ka pule puthi u Rakkam A. Sangma.
Na ka liang u Sangma u la batai ba ha ka por ba la dep, ki agency na Manipur ki dang peit ïa ka jingpyntreikam ïa ka EMRS bad halor kane ka sorkar ka dang bishar, hynrei mynta ba ïa ka jingkitkhlieh la pynkynriah sha ka sorkar jylla, na ka liang jong u, ula khmih lynti ba kane ka kam kan sa ïaid sted noh.
U la ïathuh ruh ba ka jingeh ha ka ban ïoh ka jaka ka la long ka daw ba ym pat lah ban tei ïa kine ki skul kiba dangsah.
“Haoid, ki don ki jaka kiba ngi mad jingeh ha kaba ïadei bad ka jingioh ka jaka na ka bynta ban tei ïa ki EMRS. Ngi la bthah ïa ki Deputy Commissioner bad ïa ki Block Development Officer ban pynbeit ïa kine ki kam. Na ka liang ka Ministry ka la pan ïa ka jaka kaba ym donkam ban siew bad kaba dei kaba shu ai sngewbha, hynrei ka jaka ha kane ka jylla ka dei kaba la long trai da ki briew, kumta kane ka la wanrah ka jingeh. Ngi dang trei ban peit ïa kine ki kam,” u la ong.
Ka prokram Eklavya Model Residential School ka dei kaba la sdang da ka Ministry of Tribal Affairs, kaba la plie ha ka 1997-98 ban pynthikna ïa ka jingïoh ka pule puthi kaba bha na ka bynta ki khynnah pule riewlum kiba sah sha ki thaiñ nongkyndong.
Ka sorkar pdeng ka ai ka jingïarap pisa kaba T. 30 lak kawei kawei ka skul bad haduh T. 30 lak shisnem kawei ka skul, katba kiwei pat ki jinglut kiba tam hap ban bei tyngka da ki sorkar jylla.
Na ka bynta ka jylla Meghalaya, ka sorkar pdeng ka la mang haduh T. 960 klur ban shna ïa ki 38 tylli ki EMRS ha kylleng ki block, kaba thmu ban pynïoh ïa ka pule ka puthi ha ka kyrdan secondary education.
Ha kylleng ka India, ki la don haduh 226 tylli ki skul Eklavya kiba la treikam, ha kaba da 68 tylli ki la ïasoh bad ka Central Board of Secondary Education.
