Diaw ka Congress bym ai rai u Lamphang halor ka jingdawa mait kyrteng ïa ki MLA phet seng

Shillong, Naiwieng 3 : Ka Congress ka pynpaw ka jingsngewdiaw halor ka jingpynslem jong u Lamphang ka ïing Dorbar Thawaiñ ka jylla ban ai rai halor ka jingdawa jongka Party ban mait kyrteng ne pynduh ïa ka jinglong dkhot jong ki lai ngut ki MLA ka Congress bad pynïasoh sha ka NPP.
Kat kum ba la ïoh jingtip bha, ka Congress mynta ka dang pynkhreh ïa ki kot ki sla ban leit ujor noh sha ka ïing bishar High Court jongka jylla ba kan tuklar noh halor kane ka kam.
“ Kam don kano kano ka jingpyni dak na u Lamphang. Nga tharai u Lamphang u la shu pynslem kai ïa ka por. Kumta ngi la rai ba ngin kiew noh sha ïing lieh ïing saw. Ki dkhot ba la jied da ka party ki la pynkhreh mynta ïa ki kot ki sla ban leit ujor noh sha ïing bishar High Court jongka jylla, ïathuh u President ka MPCC u ma Vincent H Pala uba dei ruh u MP ba mynshwa ka jylla.
U ma Pala u la kynnoh da kaba ong ba i kumba u Lamphang um kwah shim rai halor kane ka kam. “ Dei na ka daw ka jingpynslem jongu ba ka Congress mynta ka la pynkhreh ban kiew ïing lieh ïing saw noh pyrshah ïa kitei ki lai ngut ki MLA jongka kiba leit pynïasoh sha ka NPP” ong u ma Pala.
Ka Congress ka la ujor ar tylli ki jingujor kawei pyrshah ïaki arngut ki MLA ba shah sospon u bah Charles Marngar MLA ka Mawhati bad ia u bah Gabriel Wahlang MLA ka Nongstoin bad kawei pat pyrshah ïa u Dr Celestine Lyngdoh MLA ka Umsning hadien ba ki la dep pynïasoh bad ka NPP ha ka 19 tarik Nailar 2024.
Ka Party ka la kdew ruh ïa ki nongrim kiba skhem pyrshah ïa ki lai ngut ki MLA ha ka shithi ba ka la ai sha u Lamphang ha ka 14 tarik Nailar bad ïa uwei u MLA ym pat ujor namar u dang wan sha ka jingïalang jongka Congress ha ka 16 tarik Nailar bad ha katei ka por um pat rai ban pynïasoh sha ka NPP.
Kat kum ki kyndon aiñ “ Ki arngut ki MLA ba shah sospon ha ka party kim lah ban leit pynïasoh sha kano kano ka party katba u Dr Celestine u bym pat rai pynïasoh ruh um lah shuh ban leit ïasoh tang marwei. Kumta ka shithi kaba ki la phah sha u Lamphang kaba ki pynpaw ba ki la dep pynïasoh sha ka NPP naduh ka 14 tarik u Nailar ka dei kaba la shu leh thok bad ka bym don nongrim satia namar ki arngut ki MLA ki la dep shah sospon lypa bad uba dang wan sha ka jingïalang ha ka 16 tarik ruh um lah ban leit pynïasoh tang marwei” pynkut u ma Pala.