Nongstoiñ, Naiwieng, 3: Ki paidbah nongshong shnong jong ki 21 tylli ki shnong jong ka thaiñ Mawshynrut kaba don ha West Khasi Hills, ki la shim da ka rai ban leit tur paidbah noh sha ophis treikam jong ka Khasi Hills Autonomous District Council da kaba pynlong ïa ka jingïakhih shong kyllaiñ myngngor naduh ka 9 tarik Naiwieng.
Kine ki 21 tylli ki Shnong ki dei kiba hap hapoh ki lai tylli ki Polling Station, kata ka Misei, Langdongdai bad Mawsmai, kiba naduh kine ki taiew bad ki bnai ba la leit noh ki ladep pynpaw pyrthei ba ki pyrshah jur ïa ka jingpynkynriah jong ka KHADC na Mawshynrut Constituency sha Rambrai-Jyrngam Constituency ha ka jingpynbeit thymmai ïa ki Constituency dang shen.
Kum ban shu pynkynmaw ba ha ki jingïalang paidbah kiba ladep ha kine ki khyndiat bnai, ki paidbah jong kine ki 21 tylli ki shnong ki la thaw da ka Joint Action Committee (JAC) bad shim rai rai ban ïakhih tyngeh ha ka jingïalang paidbah kaba long hynnin ka sngi saitjaiñ ha Mawsmai.
U Chairman jong ka JAC Bah Jerimiïa Dkhar u la ong ba kine baroh ki mih namar ka jingïai sngap mynthi jong ka KHADC ïa ki jingdawa ban pynphai biang ïa baroh ki shnong sha ka Mawshynrut Constituency. U la ong ba ka JAC ryngkat bad ki paidbah nongshong shnong ka la pynbna ban leit tur paidbah bad ban ïashong kyllaiñ myngngor ha KHADC ryngkat ki plakad ha ki kti.
U Bah Jeremiïa u la ong ba ki paidbah ka Nongtrai Sepngi kin leit ban ïashong dihsha bad bamja lang bad u Chief Executive Member (CEM) ka KHADC u Bah Pynïaid Sing Syiem bad u Deputy CEM u Bah Pynshngaiñ N. Syiem, ban pynbor ba dei ban pynphai biang ïa ki 21 shnong sha ka Mawshynrut Constituency.
U la ong ruh ba ka JAC ka la kren da kaba shai lada jia eiei kaba sngewsih ïa ki paidbah jong ki 21 shnong ha ka jingleit shong kyllaiñ myngngor, u CEM bad u Dy CEM ka KHADC ki dei ban shim hi ïa ka jingkitkhlieh.
