Khliehriat, Naiwieng, 03: Ki shipai BSF jong ka 193 Battalion kiba la ïoh jingtip kaba bniah na ki tnat syntiat ha ka sngi Saitjaiñ ryngkat ka jingïatreilang bad ki Pulit ka Jylla Meghalaya ki la ïohbat ïa kawei ka longkmie nong India kaba buh ïa ki lut pisa thok ha khappud South West Khasi Hills District, Meghalaya.
Ïa kine ki lut pisa thok kiba don haduh 70 hajar tyngka da ki lut san spah la kurup na ka iing ha Gumaghat hajan ka khappud.
Ïa kane ka longkmie bad ïa ki lut pisa thok la kurup noh da ki Pulit jong ka Ranikor Police Station na ka bynta ban pynlong ïa ka jingtohkit kaba bniah katkum ki kyndon jong ka aiñ.
