Dap 50 snem ka Mawlyngkut Secondary School, ka jingnang jingstad kam myntoi lada ngi klet ïa U Blei: AL Hek

By Mawphor Editor On Nov 4, 2024

Mawkyrwat, ‘Naiwieng, 03: Ka Mawlyngkut Secondary School, East Khasi Hillls District ka la ïoh ban rakhe lehkmen ïa ka jingdap bad kynjoh ïa u mawmer ba 50 snem ne ka Golden Jubilee jong ka jinghikai ïa ka jingnang jingstad na ka bynta ki khynnah skul ha ka dong ka thaiñ baroh kawei.
Ha ka sngi jong ka jingrakhe u bah A.L. Hek, MLA bad kum u Myntri ka tnad treikam jong ka Animal & Husbanary bad kiwei de jong ka jylla Meghalaya u la long kum u kongsan bad u bah Ollan Singh Suiñ MLA ka Mawsynram kum u symbud kongsan bad ha kane ka sngi kyrpang la ïoh ruh ban pule ïa ka History jong ka skul naduh ba la sdang seng ïa ka, ha u snem 1973 bad ka jingaiti ïa ka Dorkhas da ka Miss Ïairishisha Kharlyngdoh sha u bah A.L. Hek bad ïa u bah Ollan Singh Suiñ.
Shuh shuh ka la don ruh ka jingplie ïa u Mawnongrim jong ka jingdap 50 snem bad ïa u Mawnongrim jong ka Mawlyngkut Secondary School bad kumjuh ruh ka jingot ïa u cake bad ka jingpyllait ïa ka kot lyngkdop ne ka Souvenir jong ka Mawlyngkut Secondary School.
U bah A.L. Hek, MLA bad kum u Myntri ka tnad treikam jong ka Animal & Husbanary bad kiwei de jong ka jylla Meghalaya haba ai jingkren ula ai shibun jingkyntien ba don jingmut bad kiba shongsbai na ka bynta ki khynnah skul da kaba ong ba ka jingnang jingstad kam myntoi lada ngi klet noh ïa u Blei. “Ka jingdonkam ha ka jingim jong ngi ka long ban don ka jingkitkhlieh, ka jingtrei shitom, bad ka jingdon ka thong ba hakhmat eh kum ki khynnah skul”, u la ong bad kumta kum ki kmie ki kpa ki ki long kita ki atiar kiba khraw tam kiba la len lade, ki tur ïa ka ding ka maw ban thaw lad ban phah skul ïa ki khun khnang ba kin ïoh ïa ka jingnang jingstad. Shuh shuh kum ki kmie ki kpa ruh ki donkam ban tip ïa ki khun haei ka lawei jong ki kin buh namar haba ki phah skul ïa ki khun ki dei ban ïit bniah ïa ki khnang ba ka jingthmu jong ki kan long kaba jop.
Ha kane ka sngi ka la long shisha ka jingrakhe kaba i shongkun lyngba da ka jingïadonlang naduh u babu Tailad Kharbani, Headmaster ka Mawlyngkut Secondary School, ki nonghikai, ki khynnah skul bad kiwei de ki riew rangbah kiba la shah khot sngewbha.