Jowai, Naiwieng, 03: Ha kawei ka jingjia kaba kham phylla ha Ïew Iawmusiang Jowai, ha kaba uwei u rangbah, u ma Jarman Lamare ula ïoh ban pyllait im ïa kawei ka sim khlaw kaba wan na ka longïing kum ka “Syiar khloo”.
Kane ka la jia ha ka por ba u Lamare u la ïohi ïa katei ka sim kaba shongthait halor uwei wire shwa ba kan hap sha madan. Da ka jingïarap lang jong ki paralok, ula lah ban kem ïa katei ka sim bad aiti noh ïa ka sha ki nongtrei jong ka tnad Wild Life, West Jaiñtia Hills, ha ka jingsakhilang ruh u Bah H.H. Mohrmen.
U Bah Jarman u dei u nongshong shnong ba pawkhmat jong ka Jowai, uba dei u nongshong shnong jong ka shnong Moosakhia bad uba dei u ba shong dukan rit ha Iawmusiang.
U Bah Melanie Passah, Project Manager jong ka Foundation for Ecological Security (FES), ula ïathuh ba katei ka jait sim (Kalij Pheasant), kiba juh don ha ki thaiñ shatei lam mihngi jong ka Ri India.
U Bah Lamare, ula ong ba ka jingïada ïa ki mrad ki mreng khamtam kiba lajan duh ka long kaba don kam ïa uwei pawei u briew ne ka briew na ka bynta ban pynneh pynsah ïa ki.
