Mawkyrwat, ‘Naiwieng 01: Hadien katto katne por jong ka jingmih ka khubor ba ong, “khylliap lama ka TMC ha Mawkyrwat”, u Vice President jong ka Trinamool Congress Mawkyrwat Block u Bah Daros Ramsiej ha ka sngi Palei mynta ka taiew u la lum ïa ka jingïalang ba kyrkieh ban ïakren sani bha halor kane ka mat ha kaba la ïashim bynta lang naduh ki nongkitkam ba hakhmat kumjuh ruh ki longkmie bad ki samla.
U Bah Daros Ramsiej haba kren sha ki lad pathai khubor hadien ba la kut ka jingïalang u la pynpaw ka jinglyngngoh halor ka jingkam jong ki katto katne ba ka Trinamool Congress ha Mawkyrwat ka la khylliap lama bad ong ba kane ka jingkam kam dei satia kaba shong nongrim namar kita kiba kam ruh kim shym la don ïa kata ka jingrai paidbah ne ka General Meeting ba paka.
U Bah Ramsiej u la pynshai shuh shuh ba ïa mynta na ka liang ki nongkynshan jong ka TMC Mawkyrwat Block hapoh ka jingïalam jong u (L) Sounder Strong Cajee kam pat shym la don kano kano ka rai la kin mih noh ne kin dang neh hynrei lada ka sngi kam pat shai ha ki kin dang ïai long hi ki nongkynshan jong ka TMC.
“Ïa ka rai ban leit kyrshan noh ïa kiwei pat ki party kum ki nongkitkam bad ki paidbah kin sa shim da ka rai kaba shai lyngba ka jingïalum paidbah da ka General Meeting khnang ba kan ym buh ha ka jingdum ïa ki paidbah bad ki nongkynshan”, ong u Bah Ramsiej.
