Lada phi kyrshan bha ïa u Amit Paul, kan eh aïu ban ai kajuh ka jingkyrshan ïa u Steve, ong u Bah Hek

Shillong, Naiwieng 01: U MLA ka Pynthorumkhrah Constituency Bah AL Hek uba long ruh u Myntri Sorkar jylla, kum shi bynta ban ai jingkyrshan ïa u samla Steve Jyrwa, u samla Khasi napoh ka jylla halor ka jinglah jong u ban poi shaduh ka rynsan jong ka Final ha ka jingïakob shad jong ka India’s Best Dancers kaba 4 mynta ka sngi ka 1 tarik Naiwieng 2024 ula buh ka jingkyrpad bad ka jingkyntu ïa baroh ki nongshong shnong jong ka jylla Meghalaya lada ki long ki Khasi, Jaiñtia ne Garo ne wat kiwei kiwei ki jaidbynriew ruh ba kin ai ka jingkyrshan kaba radbah ïa u Steve Jyrwa khnang ba kan long ka burom kaba khraw ïa une u samla, ïa ka ïing ka sem jong u bad ruh ïa ka jylla hi baroh kawei.
U Bah Hek ula ong haba bishar ïa ka jingdon jong ki paidbah kiba kyrshan ïa u lah ban ïohi ba wat na kiwei ki jylla ha ka Ri ruh ki ai ka jingkyrshan ïa u bad kan eh aïu ïa ki nongshong shnong jong ka jylla ban ai ka jingkyrshan ïa une u samla ka jylla bad ula ong ruh ba dei kum ki nong Meghalaya ki dei ban ai bha ka jingkyrshan ïa u Steve namar lada ka jingkyrshan kam don na la ïing kumno yn ap sa ïa ki jingkyrshan jong ki briew kiba nabar ka jylla.
Na ka liang u Bah Hek ula pynkynmaw ruh ba ha u snem 2008 ha ka por ba u Amit Paul ula poi sha ka Final ha ka jingïakob rwai jong ka Indian Idol katno ba ki paidbah napoh ka jylla Meghalaya ki la ïamih na la ki ïing ki sem ban ïa kyrshan ïa u Amit Paul da kaba vote lyngba ka phone call, ha kajuh ka rukom na ka liang u Myntri Sorkar ula kyntu bad kyrpad jur ïa ki paidbah ba kin ai kajuh ka jingkyrshan ïa u Steve Jyrwa uba long u khynnah samla Khasi ba nyngkong ban poi shaduh ka Final ha ka jingïakob shad.
Lah ban ong ba u Samla Steve Jyrwa uba dei u samla napoh ka jylla Meghalaya uba ka jinglah jong u ban pynktik bad pynïapbiej ïa ki nongbishar lyngba ka jingshad jong u ha kawei na ki jingïakob shad kaba heh hapoh ka Ri India ïa kaba la tip kum ka India’s Best Dancers Session 4 bad uba la long ruh ka mat ïakren hapoh ka nongbah Shillong ha ka jylla bad ruh ha ka Ri hi baroh kawei hadien ba u la shah jied ban rung sha ka top 6 jong kane ka jingïakob, mynta ka kynti pat une u samla ula ïoh ban rung beit beit sha ka Final hadien ba ula lah ban pyni ïa ka sap shad jong u ha kane ka jingïakob shad kaba la pynlong ha Mumbai.
Haba iakren bad ki nongthoh khubor ha sngi Thohdieng na ka liang ka kmie jong u Steve Jyrwa ka kong Bibi Jyrwa ka la pynpaw ka jingsngewnguh ïa U Blei bad ruh ïa u MLA jong ka Pynthorumkhrah Constituency Bah AL Hek uba la kyrshan borbah ïa une u samla ha ka jingïaid lynti jong u ha kane ka jingïakob shad bad ruh ïa ki paidbah nongkyrshan baroh.
Na ka liang ka kong Bibi Jyrwa ka la pyntip ruh ba mynta ka taïew kan dei ka taïew kaba khatduh ba ki paidbah kin lah ban kyrshan ïa u Steve da kaba vote. Namar ba don ar tylli ki App kata ka Sony Liv bad ka Lenskart ki paidbah ki lah ban Vote tang 500 tylli na kawei kawei ka App bad ka jingïakob jong ka Final kan long ha ka 10 bad 11 tarik u Naiwieng 2024.
U President jong ka All Meghalaya Dancing Association Bah Kitbok Thabah ula kyntu ïa ki paidbah ba kin ai ka jingkyrshan ïa u Steve Jyrwa namar kumba la tip ba une u samla na ka jylla un hap ban ïa aireng bad ki samla kiba tbit na kiwei pat ki jylla ha kane ka jingïakob. Ha kajuh ka por u President jong ka AMDA ula ai khublei ruh ïa u Myntri Rangbah ka jylla U Conrad Sangma, ïa u Bah Paul Lyngdoh bad kiwei kiwei ki Myntri sorkar kiba la kner ïa ki lad jingïarap bad buh ruh ka jingkyrpad ïa ka sorkar ba kan ai ka jingkyrshan ïa ka seng kaba don ka jingthmu ban sei ïa ki samla ki ban mihkhmat ïa ka jylla ha ka liang ka shad sha ki rynsan kiba long hapoh ka Ri bad shabar jong ka Ri ruh kumjuh.