Shillong, Naiwieng 01: Ka khubor ba la ïoh na ki pulit la ïathuh ba ha ka 28 tarik u Risaw ha ka por kumba 9.30 baje mynmiet, ki runar bym lah ban ithuh ki la shoh ïa uwei u briew uba la tip kyrteng u Bah Ronney Lamare ba la 22 snem ka rta hajan Ward’s Lake, Shillong. Ha kane ka jingjia utei u lanot u la mynsaw bad la phah sumar noh ha Civil Hospital Shillong.
Ha kawei pat ka jingjia ki pulit ki la ïathuh ba u Bah Calmesroy Kharsati u la phah ka jingujor ba hapdeng ka miet jong ka 28 bad 29 tarik u bnai Risaw, ki runar bym lah ban ithuh ki la tuh ïa ka thuk thuk jong u kaba don u nombar ML-05AA-1605 napoh Laitumkhrah, Nongrim Road, Shillong.
Shuh shuh ki pulit ki la ïathuh ba u Ivan W Sangma u la phah ka jingujor ba ha ka 28 tarik u bnai Risaw ha ka por kumba 12.30 baje mynstep, ki runar bym lah ban ithuh ki la tuh ïa 4 tylli ki masi napoh ka sem kaba don hapoh ka shnong Rongreng Bhaija East Garo Hills District (EGH).
Ha kawei pat ka jingjia ki pulit ki la ïathuh ba ha ka 28 tarik u bnai Risaw, katkum ka jingtip kaba thikna, ki pulit ki kem ïa 8 ngut ki nong Bangladeshi kiba kyrteng Bilal Hussain ba la 31 snem ka rta, Md Alongir Hussain ba la 51 snem ka rta, Md Sahin Hussain ba la 19 snem ka rta, Md Rimon ba la 19 snem ka rta, ka Belli Bibi ba la 30 snem ka rta bad 3 ngut ki khynnah kiba ha ka rta kaba 17, 14 bad 8 snem, ïa kine la kem na Dalugaon PWD Road West Garo Hills (WGH). Ha ka por ba pynlong ïa ka jingtohkit, la lap ba kine ki mynder ri ki la rung shapoh u pud u sam ka ri India naduh u bnai Jylliew ne Naitung jong u snem, 2020, lyngba ka Lalgola Murshudabad West Bengal (WB) bad ki dang thmu ban leit sha ka shnong Dalugaon, da ka jingthmu ban leit phai biang noh sha ri Bangladesh, khlem ki kot ki sla kiba biang.
