Ka Anderson HSS ka jingsarong ïa ka Nongstoiñ bad West Khasi Hills: Gabriel Wahlang

Nongstoiñ, Risaw 29: Ka Anderson Higher Secondary School kaba don ha Upper New Nongstoiñ West Khasi Hills, ha ka sngi ba ar jong ka taiew ka la ïoh ban rakhe ïa ka sngi ba kyrpang jong ki kmie ki kpa lane ka Parent’s Day Celebration ha ryngkat ka phuh ka phieng bad shongkun bha.
Kaei kaba la pynphuh pynphieng eh ïa kane ka sngi kyrpang jong ki kmie ki kpa ba phah pule ïa ki khun ha kane ka skul, ka long lyngba ki program ba kyrpang ba la ïashim bynta da ki khynnah skul kynthup ïa ki heprit naduh ka kyrdan Nursery, kiba la pynshoh biej bad pynsngew tynnad ïa la ki kmie ki kpa, ki nonghikai, ki nongshah khot sngewbha bad kiwei kiwei.
Lyngba ka rynsan ba la shna kyrpang na ka bynta jong ki, ki kmie ki kpa ki la sakhi ïa ki jingshad lyngba ki rukom riam ba khampher, ki jingrwai ba sngew tynnad, ka jingpyni ïa ki riam tynrai, ka jingrwai ieit Ri, ka phawer, jingsneng tymmen, jingleh burom da kaba pyni ha rynsan ïa ki nongthoh kot bad ki nongïalam kiba la saiñ dur ïa ka jingnang jingstad ha ka jylla bad kiwei kiwei ki jingïalehkai pynbyrngia ba bun jait.
U Bah Gabriel Wahlang u ba long u MLA bad MDC ka Nongstoiñ Constituency, u ba bat ruh ïa ka kam kum u nongaibuit jong ka sorkar jylla, jong ka Mining and Geology bad ka tnad Public Health Engineering u la ong u kongsan. Katba u Bah H.K Thabah, Additional Deputy Commissioner ka West Khasi Hills, u la long u symbud kongsan ha ryngkat ka jingïadonlang u Pa’iem ka Hima Nongstoiñ u Pa’iem E. P Syiem, ki ophisar sorkar, ki nonghikai, ki kmie ki kpa bad kiwei kiwei.
Haba kren kum u kongsan u Bah Gabriel Wahlang u la pynpaw ka jingsngewkmen namar ha sien ba nyngkong kum u nongmihkhmat, u la ïoh ban donlang ha kane ka skul.
U la ai burom bad ïaroh ruh ba naduh ba la seng ïa ka ha u snem 1991, ka skul ka la sdang katba lah da ka jingpyrshang barit eh bad mynta pat kane ka skul ka la kiew sha jrong ha ki liang baroh. Ka la kylla long ruh ka skul kaba paw nam napdeng ki skul ha ka District bad ha ka jylla.
U la ban jur halor u synñiang jong kane ka skul ban kyntiew ïa ka pule puthi ha ka dong ka thaiñ bad kane ka skul mynta ka la long ïaryngkat bad kiwei pat ki skul ha ka jylla.
Ha ba ai khublei kyrpang ïa ki kmie ki kpa, u la ong ruh ba ki kmie ki kpa ki dei ki riew shlur bad ki la aiti met bad mynsiem ban pynbit pynbiang, kumta ym dei ban klet ïa ki la ngi don ha kano kano ka kyrdan.
U la ai ruh ka jingïaroh ïa ka skul Anderson kaba la long ka jingsarong ïa ka West Khasi Hills, na ka jinglah jong ka skul ban ïoh 100 percent ka Pass Percentage bad na ka jinglah jong ka ban sei ïa ki khynnah kiba la wan shakhmat ha ki kyrdan bapher bapher.
Kum u nongmihkhmat u Bah Gabriel Wahlang, u la kular skhem ba un ïai don ryngkat bad kane ka skul la ha kino kino ki bynta kiba ka skul ka donkam ïa u ba ïarap lem.
Katba na ka liang u Bah H.K Thabah, Additional DC ka West Khasi Hills u la kyntu ïa ki knje ki kpa, ba kin ym dei ban ailad ïa la ki khun ba kin pyndonkam ïa ka internet khlem u pud, namar ka lah ban poi sha ka jingïalam bakla lyngba ki rynsan social media ba bun jait.
U la kyntu ruh ba ki kmie ki kpa kin long kiba phikir ïa la ki khun ba kin lait na kaba ngop ha u drug bad kiwei pat ki jingsniew ba bun jait bad ban long kiba adkar ïa la ki khun ba kin nym ngat ha ka shongkha khynnah.
U la pynpaw ruh ba ka West Khasi Hills ka dei kawei na ki District kaba kiew bha ha ka jingdon ki khynnah ba pep skul shiteng por. Kumta u la ban jur ïa ki kmie ki kpa ba kin ïatreilang ban kyntiew ïa ki pule puthi jong ki khynnah.
Hadien ka jingïalang, la ïoh ban plie ruh ïa maw sah kynmaw na ka bynta ki nongseng jong katei ka skul bad kumjuh la ot ruh ïa u Ribbon ban plie pyrda ïa ka Exhibition Room jong ka skul.