Donkam na la rympei ban pynsngewthuh ïa ki khun ïa jingshyrkhei u drok: Bah Sanbor

Shillong, Risaw 27 : U MLA ka Shillong South, Bah Sanbor Shullai u la ong ba donkam naduh na la rympei iing ban pynsngewthuh ïa ki khun ki kti shaphang ka jingshyrkhei jong u drok uba la sdang ban jyllei bad kynrei ha man la ki shnong bad ki dong jong ka jylla.
Ïa kane u Bah Sanbor u la kren ha ka jingïalang pynkup burom ïa ki 256 ngut ki samla ba pass bha kiba dei na Shillong South ha ka jingïalang kaba long ha Soso Tham Auditorium ha kane ka sngi Saitjaiñ.
“Lyngba kine ki jingïakynduh ba ngi lah ban ai ka khubor sha ki samla pule, sha ki kmie ki kpa bad ki nonghikai, ki komiti niam, ki sengbhalang, ki Dorbar Shnong, ki Hima namar dei tang lyngba ka jingïasnohkti lang kaba lah ban ïakhun pyrshah,” u la ong.
U Bah Sanbor uba bat ruh kum u Chairman ka MTDC, u la ong ba tang ka sorkar kam lah satia ban leh ei ei hynrei donkam jingïatrei lang jong ki paidbah.
“Kumba ka kyntien ka ong kiei kiei dei ban sdang na la ïing, kumta ruh donkam ban sdang na la iing ban pynsngewthuh ïa ki khun samla, nangta na ki dong ki shnong bad kumta ter ter,” u la bynrap biang.
Une u nongmihkhmat u la ong ruh ba kum u nongmihkhmat u la shim ïa ka bynta ban lum ïa ka jingïalang kumno ban ïakhun pyrshah ïa ki bor jong u drok kiba la sdang ban kynrei bad i shyrkhei.
Ha kajuh ka por, u Bah Sanbor u la ïathuh ba ki jylla ka thain shatei lam-mihngi jong ka ri kynthup ïa ka Assam, ka sorkar pdeng ka la mang da ki hajar klur na ka bynta ki 1500 tylli ki rehabilitation centre.
Kumta u ong ba donkam ïa ka jylla ba kan pan ka jingkyrshan na ka sorkar pdeng halor kane ka mat ruh. La ïathuh ba u la dep ruh ban kren bad u Myntri Rangbah halor kine ki centre bad u la ïoh ruh ïa ka jingkular ba shen kin sa leit ban jurip ïa ka jaka ha Mawdiangdiang.