Shillong, Risaw 27: Ka tnat Public Works Department (PWD) kan pynkylla ïa ki surok kiba thymmai kiba la tyrwa mynshwa ba kidei ki Smart Road Project (SRP) hapoh ka Shillong Smart City.
Halor kane na ka liang u Symbud Myntri Rangbah u Bah Sniawbhalang Dhar u la pyntip ba ka sorkar jylla kan shna ïa ki surok kiba jngai kumba 40-50 jong kine ki surok hapoh ka nongbah ha ka jaka jong ki Smart Roads Project kiba la dep ban pyndam.
“Ngi la iehnoh ïa kine ki project naba ngi mad ïa kiba bun ki jingkyllaiñ ha ki kam ki jam. Na ka bynta ban bteng ïa kine ki project, na ka liang ka tnat PWD ka la pynkhreh ïa ka jingmang pisa na ka jan baroh ki surok kiba kongsan hapoh ka nongbah Shillong,” ong u Bah Dhar da kaba bynrap, “Ngin sa ïoh ïa ki surok kiba bha.”
Ha u Naitung mynta u snem, ka sorkar ka la rai ban pyndam noh ïa baroh ki 17 tylli ki project ha ka nongbah kiba la mut ban pynkylla ïa kine ki surok ba mynta sha ki ‘smart roads’ ha ka jinglut kaba long T. 36 klur.
Ïa ka Smart Road project, ha kaba sdang la thmu ban pynwandur bad ban kyntiew ïa ki jingtei jong ki surok kiba don hapoh ka nongbah da ki tiar kiba long katkum kane ka juk kaba mynta bad ban pynbha ruh ïa kine ki surok, hynrei naba mad bun ki jingeh ba kynthup ïa ka jingshim jaka, ka jingduna pisa bad kiwei kiwei. Na kine ki daw kaba la pynlong ïa ka sorkar ban khmih biang ïa kine ki project bad ha kaba khatduh ka la rai ban pyndam noh ïa ki.
Ka sorkar ka la mad ïa ki jingshah pynrem halor ka jingpyntreikam ïa kine ki Smart City Project, hynrei na ka liang u Bah Dhar u la ong, “Ngi la don ha ka kam ban pynbha ïa baroh bad shen kin sa shim ïa ka rai hynrei hap long kiba ïaishah.”
