Ym pat pynkut ka Sorkar ïa ka lynti Rel, yn khot ïasyllok biang ïa ki kynhun: Dy. CM

Shillong, Risaw, 25: U Symbud Myntri Rangbah uba khmih ïa ka tnat Transport u Bah Sniawbhalang Dhar ha ka sngi Thohdieng u la ong ba ka Sorkar kam pat iehnoh satia ïa ka jingthmu ban wanrah ïa ka lynti Rel sha ka jylla Meghalaya.
Ha ka jingïakren bad ki lad pathai khubor, u Bah Dhar u la ong, “(ngim) pat iehnoh ïa ka. Ngim pat shim ïa ka rai (namarba) ngin hap ban khot ïa syllok shwa ïa baroh ki kynhun.”
“Ynda la khot ïasyllok shwa ïa baroh ha kata ka por ngin sa ïa ka rai kum ka Sorkar,” u la bynrap.
Lah ban kdew hangne ba ka Sorkar Pdeng ka la tyrwa ar tylli ki Railway Project hapoh ka jylla, kata, ban shna ïa ka lynti rel kaba jrong 22 kilomitar ka ban pynïasoh na Tetelia sha Byrnihat bad na sha Shillong kaba jrong 108 kilomitar.
Ïa ka projek lynti Rel jong ka Tetelia-Byrnihat yn pyntrei ha ka mang pisa kaba kot T. 496. Hynrei kine ki projek kim shym la urlong satia na ka daw ka jingkhang lynti bad ka jingpyrshah jong ki kynhun bapher bapher halor ka jingsheptieng ïa ka jingwan rung kyrthep jong ki briew kiba nabar ka jylla.
Ki kynhun kiba pyrshah ïa ka jingwan rung ki briew kiba nabar ki la dawa ïa ka Sorkar Jylla ban wanrah shwa da ki aiñ kiba khanglad ïa ka jingrung kyrthep jong ki briew kiba nabar shwa ban shim ïa ka rai ban wanrah ïa ka lynti Rel ha rilum Khasi bad Jaiñtia.
Dang shen, ka Meghalaya Tourism Development Forum (MTDF) ka la pynpaw ba ka Sorkar Jylla ka dei ban wanrah ïa ka polisi kaba jlan ban kyntiew ïa ki karkhana jngohkai pyrthei bad ka la kyrpad ruh ïa ka Sorkar Pdeng ba kan sngap ïa ka jingtyrwa ban wanrah ïa ka High Speed Luxury Rail Network ban pynduna ïa ka por leit por wan na Guwahati sha Shillong.
Haba kylli halor kane, u Bah Dhar u la ong ba ka jingtyrwa (jong ka MTDC) ka dei kaba bha, kam dei satia kaba sniew.
“(Hynrei), kine ki kam ki hap hapoh ka tnat Tourism. Lehse ngan hap ban da ïoh jingtip kaba thikna na ka tnat Toursim kaei ka jingïakren namarba kam hap hapoh ka tnat treikam jong nga, ka dei ka kam jong ka tnat Tourism,” u la bynrap.