Ki mynder Bangladeshi ba shah beh na Assam kin rung sha Meghalaya bym don ka ILP:HYC

Shillong, Risaw 19: U nongïalam ka HYC Seng kmie u Bah Roy Kupar Synrem u la ong ba ka seng ka la ïohi ïa ka hukum ba la pynmih da ka Supreme Court kaba la pynskhem ïa ka section 6 A jong ka Citizenship Act ha kaba kane ka dei beit thik ïa jingïasoi ka Assam Accord 1985 kaba ong ba ki briew kiba shong basah hapdeng ka snem 1966 bad 1971 bad kino kino ki briew kiba wan hadien jong u snem 1971 dei ban kheiñ ïa ki kum ki nongwan rung kiba beaiñ ne ki poiwir beaiñ bad ki dei ban kem bad phah sha ka ri ba ki wan.
Haba kren sha ki lad pathai khubor ha ka sngi Saitjaiñ hadien ba la mih kane ka hukum, u la ong, ka seng ka la pynpaw ïa ka jingsngewkhia naba kane ka Accord kan treikam beit tang hapoh Assam bad haba peit ïa ka jylla Meghalaya kam shym la don ka ILP bad ki briew kiba nabar ki lah ban rung ban mih katba mon ha kane ka jylla nalor ba kam don ïa ka NRC bad ym lah ban tip uno u bar jylla uba la shong basah naduh ki snem 1950 ne 1951 ne 1971 bad hadien ba la mih kane ka hukum ka Sorkar dei ban peit bha ban peit thuh bad ban sngewthuh bad kum ka jylla donkam ïa ka ILP khnang ba kito ki briew kiba sah ha Assam kin ym don lynti shuh ban sah ha Assam hadien ka snem 1971 kaba long ruh katkum ka hukum jong ka Supreme Court u dei u nongshong shnong ba beaiñ bad um dei ruh u nongshong shnong jong ka ri India dei ban beh ne phah noh sha ka ri ba ki wan.
Kumba la ïohi manla ka por la shem ba bun ki nong Bangla kiba sah ha Assam ki dei hi kiba wan na Bangladesh bad kumta dei ban phah biang ïa ki sha katei ka ri, u la bynrap.
U la ong ruh ba ki nong Bangladesh kin phet shaei naba ka jaka kaba ïajan eh bad ka Assam ka dei hi ka Meghalaya nalor ba ka jylla kam don ïa ka ILP bad kine ki briew kin ym lah ban leit sha Arunachal Pradesh bad sha kiwei pat ki jylla kane ka thaiñ shatei lammihngi naba kiba bun kine ki jylla ki la don lypa ïa ka ILP.
“Ngi kyrpad ïa ka Sorkar Jylla ban pynbor ïa ka Sorkar Pdeng ban ai noh ïa ka ILP ha kane ka jylla bad ba ka jylla jong ngi ka dei ban don noh ïa ka NRC namar kumba ka long mynta ka jylla jong ngi ka don ruh ïa ka khappud bad ka ri Bangladesh ym tang bad ka Assam bad kiba bun ki briew kiba wan rung tuh sha kane ka jylla kaba ngim lah ban tip naduh mynno ki wan ne la ki wan hadien u snem 1971 ne ha shwa jong une u snem,” u la ong bad bynrap, “ka seng ka dawa ba kito ki briew kiba wan hadien ka 1971 dei kiba rung beaiñ bad dei ban kem ïa ki bad dei ban phah sha ka ri ba ki wan.”