Dibrugarh, Risaw 19: Ka kynhun ba 5 ngut jong ka CBI ki la wan poi ha Dibrugarh, ban pynlong ïa ka jingtohkit halor ka jyrsieh khaïi Online kaba la kot da ki hajar klur pyrshah ïa u Bishal Phukan, ka nongak phlim ka Sumi Borah, Tarkik Borah bad u Amlan Borah.
U Superintendent of Police ka Dibrugarh u Rakesh Reddy ula pynthikna ïa ka jingwanpoi jong katei ka kynhun ki 5 ngut ki Ophisar CBI bad ula ong, “Ïa ki kot ki sla kiba donkam kiba ïadei bad katei ka jingjia, la dep ban aiti ha ka kynhun jong ka CBI hapoh ka Dibrugarh Police Station. Ngi ai ka jingïatreilang kaba pura bad ki”.
Haduh mynta ka jingtohkit la pynïaid shakhmat da ki pulit jong ka Dibrugarh hapoh ka jingïalam u Additional SP (Crime) Sizal Agarwal.
Ki tyllong khubor ki la ïathuh ba ka jingtohkit ïa kiba donkti ha katei ka kam kiba don hapoh jong ka Dibrugarh Central Jail yn sa sdang noh da ka kynhun jong ka CBI naduh ka sngi saitjaiñ.
Ha ka 3 tarik u Nailur, u nongshna bad nongpynwandur ïa ka jyrsieh khaiï Online kaba da ki hajar klur tyngka u Bishal Phukan 22 snem ka rta ula shah kem ha ki pulit ka Dibrugarh Police hadien ba katei ka jyrsieh kaba la antad ba ka la kot ïa ka T.2,200 Klur ka la paw pyrthei. Ki pulit ka Dibtrugarh kila shim suo-motu case halor katei bad hadien la ujor 4 tylli ki ejahar da ki katto katne ki nongbei tyngka pyrshah ïa u Bishal Phukan.
Halor kane arngut na ki nongïarap jong u Phukan kiba kynthup ïa ka Sumi Borah bad u nongshondur u jong ka uba dei ruh u kurim jong ka u Tarkik Borah kila shah kem ha ka Special Task Force (STF) jong ki pulit Assam ha ka 12 tarik u Nailur. Shi sngi shwa katei, u para kynsi jong ka Sumi u Amlan Borah ula shah kem na Muzzaffarpur District na Bihar ha ka jingkhynra kaba la pynlong da ki pulit ka Assam bad pulit ka Bihar. La pynngat ïa une uba la shah kem ha ki kyndon 316(2)/318(4) jong ka BNS 2023, ryngkat bad ka kyndon 21/23 jong ka Banning of Unregulated Deposit Scheme Act, 2019.
La ong ba katkum ka jingïathuh ki pulit, katei ka jingkhaiï online ka la treikam mynta la jan 3 snem, ha kaba la pynbiej ïa ki paidbah da kaba kular ban siew arshah ïa ka pisa kaba kila bei hapoh jong ka 60 sngi. Ki bor kiba dei khmih ki la kynnoh ba ïa ka pisa kaba la lum la thep sha ka karkhana shimet kaba lam sha ka jingleh thok ïa palat 1500 ngut ki nongbei tyngka.
