Pynlong jingïalap paidbah ka DLSA-EJHD ban wanrah biang ïa ki khynnah ba pep skul shiteng por sha ki shlem ai jingnang jingstad
Khliehriat, Risaw 17: Ka ophis jong ka District Legal Services Authority (DLSA), East Jaiñtia Hills District ha ryngkat ka jingïatreilang bad ka Meghalaya State Legal Services Authority (MSLSA) lem bad ka RED FM, Shillong, mynta ka sngi ka la pynlong ïa ka prokram ba kyrpang ha ïew Ladrymbai bad ha ïew Khliehriat.
Kane ka prokram ka long kum ka prokram ai jingpynshai ne ka awareness/campaign prokram halor ka phang ba iadei bad ki khynnah, ka ‘Opening Doors for Education to Children and Back to School Campaign’ kaba la pynshai ba ka don ka lynti ïa ki khynnah kiba la pep skul shiteng por, ban ioh biang pat ïa ka jingnang jingstad bad wanrah biang pat ïa ki sha ki skul pule.
Ha ka prokram ba la pynlong ha ïew Ladrymbai, ka Deputy Legal Aid Defence Counsel, East Jaiñtia Hills District, ka kong K. Challam ka la batai bad pynshai ïa ka jingthmu jong kane ka jingpynshai paidbah ne ka campaign bad ka la kren ruh halor ka jingdonkam ka jingnang jingstad, ka la kyntu ïa ki paidbah ba ki dei ban pyn thikna ba ki khun ki kti jong ki ki dei ban leit sha ki skul pule.
Ka kong K.Challam ka la kren ruh halor shibun kiei kiei kiba la pynlong ïa ki khynnah ban pep skul noh tang shiteng por, kumjuh ruh ka jingpyntrei bor bah ïa ki khynnah ne kata ka child-labour, ka jinïashongkha khynnah ne ka child-marriage bad kiwei kiwei, kum ka muktiar ka la pynshai ruh halor ki jingmana bad ki kyndon aiñ kiba iadei bad ka jing pyntrei bor bah ïa ki khynnah (Prohibition of Child Labour Act), ka jingshongkha khynnah (Prohibition of Child Marriage Act) bad ong ba ki khynnah ki dei ban ioh ïa ka jingnang jingstad ba ju tip kum ka Free and Compulsory Education to Children Act.
Ka Out of School Children (OoSC) Co-ordinator, Samagra Shiksha (EE), East Jaiñtia Hills District, ka kong R. Sungoh ka la batai bad pynshai halor ki skim bapher bapher na ka bynta ki khynnah ba pep skul shiteng por ban wanrah biang ïa ki sha ki skul pule namar ka jingnang jingstad ka long kaba donkam ha ka jingim kaba man ka sngi.
Kiwei pat kiba la ai jingkren ki kynthup ka ka Legal Aid Counsel, DLSA, East Jaiñtia Hills District, ka kong Melody War bad u Special Educator, East Jaiñtia Hills District, u bah S. Kamar.
Kiba la ïa don ryngkat ha ka prokram ha Ladrymbai ki kynthup ka Secretary, District Legal Services Authority (DLSA), East Jaiñtia Hills District, ka kong B. Kharbithai, ka Deputy Legal Aid Defence Counsel, DLSA, East Jaiñtia Hills District, ka kong K. Challam, ka Legal Aid Counsel, DLSA, East Jaiñtia Hills District, ka kong Melody War, Out of School Children (OoSC) Co-ordinator, Samagra Shiksha (EE), East Jaintia Hills District, ka kong R. Sungoh, u Special Educator, East Jaiñtia Hills District, u bah S. Kamar, ki muktiar ki heh sorkar kiba na ki tnat bapher bapher, ki khynnah skul, ki nonghikai bad kiwei kiwei.
Ha ka prokram ba la pynlong ha ïew Ladrymbai ka la ioh ruh ïa ka skit na ki khynnah jong ka skul Little Star Secondary School, Ladrymbai, ki jingtah ïa ki Poster na ka skul Cambridge Secondary School, Ladrymbai, ki jingrwai na ki khynnah skul jong ka skul Good Shepherd Secondary School, Ladrymbai bad ki jingpule ne Recitation na ki khynnah skul jong ka skul Oxford Secondary School, Ladrymbai, kiba la kren halor ka jingdonkam ka jingnang jingstad.
Ha ka prokram ba la pynlong ha ïew Khliehriat pat, la ioh ïa ki jingkren na ka Secretary District Legal Services Authority (DLSA), East Jaiñtia Hills District, ka kong B. Kharbithai, ka Deputy Legal Aid Counsel, East Jaiñtia Hills District bad na ka OoSC Coordinator, Samagra Shiksha (EE) East Jaiñtia Hills District, ka kong R. Sungoh,
La ioh ïa ka jingpule ne Recitation na ki khynnah jong ka skul Khliehriat Higher Secondary School, kiba la pule halor ka phang ba ka jingnang jingstad ka long kaba donkam, la ioh ruh ïa ki jingtah ïa ki Poster na ki khynnah jong ka skul Khliehriat Presbyterian Higher Secondary School.
La ong ba ka Meghalaya State Legal Services Authority (MSLSA) kaba hapoh ka jingialam bad ka jingpeit jong ka Executive Chairman, MSLSA ka la shim khia ha kaba ïadei bad kane ka prokram jingialap paidbah ne ka campaign khnang ban wanrah pat ïa kito ki khynnah kiba la pep skul noh shiteng por ba kin wan phai biang sha ki shlem ai jingnang jingstad bad ruh ban ïada ïa ki hok jong ki kumba la saiñdur ha ka Article 21A jong ka riti synshar jong ka ri India lane ka Indian Constitution, kumjuh ruh ban pynioh ïa ka jingnang jingstad ïa ki khynnah lyngba ka Right of Children to Free and Compulsory Education Act, 2009.
Kiba la ïa don ryngkat ha kane ka prokram ha Khliehriat ki kynthup ka Assistant Commissioner, East Jaiñtia Hills District, ka kong F. Wann, ka Secretary, District Legal Services Authority (DLSA) East Jaiñtia Hills District, ka kong B. Kharbithai, ka Deputy Legal Aid Defence Counsel, DLSA, East Jaiñtia Hills District, ka kong K. Challam, ka Legal Aid Counsel, DLSA, East Jaiñtia Hills District, ka kong Melody War, OoSC Coordinator, Samagra Shiksha (EE), East Jaiñtia Hills District, ka kong R. Sungoh, u Special Educator, East Jaiñtia Hills District, u bah S. Kamar, ki muktiar kiba na East Jaiñtia Hills District lem bad ki khynnah skul lem bad ki nonghikai.