Mynta lah ban pynbna kyrtong ka Congress, hato yn sei kyrtong ka VPP ha Gambegre

Shillong, Risaw 16 : Ki seng saiñpyrthei kiba don ha ka jylla ki sdang ban khih khohreh hadien ba ka Election Commission jong ka Ri ka la pynbna ba ka jingjied ïa u/ka MLA ba thymmai na Gambegre Constituency kan long ha ka 13tarik u Naiwieng, mynta u snem.
Lah ban kdew hangne ba ka jingwan jong ka elekshon shiteng samoi kadei na ka jingresaiñ noh u MLA ka thaiñ u Saleng A Sangma hadien ba u la shah jied noh kum u MP jong ka Tura Parliamentary Seat.
Kumba long haduh mynta ki don ki party kiba la dep ban pynbna ïa ki kyrtong bad don pat kiba dang pynkhreh ban pynbna ha kine ki khyndiat sngi ban wan.
Haba phai sha ka NPP ka party kaba ïalam ïa ka sorkar MDA, ka la pynieng da ka kurim jong u Myntri Rangbah ka jylla, ka Dr. Mehtab Chandee A Sangma kum ka kyrtong.
Katba ka All India Trinamool Congress ka la pynbna ban pynïakhun da ka MDC kynthei ba marwei ha Garo Hills Autonomous District Council (GHADC) na Dengnakpara ka Sadhiarani M. Sangma kaba dei ruh ka kurim jong u MLA barim ka Rangsakona u Zenith M. Sangma.
Ïa ka Gambegre Constituency la mihkhmat da u Saleng A. Sangma uba la jop na ka tiket jong ka seng Congress hynrei haduh mynta ka Congress kam pat pynbna satia ïa u/ka kyrtong ban pynïakhun ha kane ka elekshon shiteng samoi.
Haba ïa kren bad u President jongka Meghalaya Pradesh Congress Committee Bah Vincent H Pala u la ong, “Mynta nga dang don ha Delhi kumta shen ngin sa pynbna noh ïa ka kyrteng.”
Katkum ka jingïathuh jong u, na ka party ki la phah tang kawei ka kyrteng sha ka All India Congress Committee ban ïoh ïa ka jingmynjur.
Haba pyrshang pat ban ïa kren bad ki nongïalam ka BJP Meghalaya ki la ïathuh ba ki pynkhreh ban aireng lang ha kane ka elekshon shiteng samoi tangba ïa ka rai ba khatduh kan dei ha ki bor bahalor jong ka party.
Ki khubor ba ioh lum ki iathuh ba ka Congress ka lah ban pynieng ia u Jingjiang Sangma, u paralok jong u Saleng Sangma katba ka BJP ka lah ban pynieng ia u Bernard Marak.
Ka jingkylli kiba bun ba lang ka long la ka VPP kaba la sdang ban bet symbai sha Garo Hills kan pynieng kyrtong ne em.
U Bah Ardent Basaiawmoit, President ka Seng, u la ong ba wat lada ki paidbah ba iakynduh ha Garo Hills ki ai jingmut ban pynieng kyrtong ha ka Constituency ba iehnoh u Saleng, hynrei ka Seng kan sa shong pyrkhat ban wad da u briew uba la sngewthuh bha ia ka nongrim jong ka Seng. Hynrei lada kam ioh ruh kan nym kyrkieh na na bynta kane ka elekshon, tangba ka jingkhang ban iakhun kam pat khang haduh mynta..
Na ka liang u Mawphor haba pyrshang ban ïa kren bad kiwei pat ki party riewlum kynthup ïa ka UDP kaba dei ka party riewlum kaba heh tam ha ka jylla ym shym la ïoh satia ban pyntikna la kin sei kyrtong neem ha katei ka elekshon shiteng samoi.
Lada jia ba ka NPP ka jop ha kane ka elekshon shiteng samoi ka jingbun paid jong ka, kan kiew sha ka 32 ngut na ki 60 ngut ki dkhot jong ka Iing Dorbar Thawaiñ ka Jylla hadien ba lai ngut ki MLA ka Congress ki la wan ban pynïasoh pura sha kane ka party.
Katba lada jop ka Congress kan kiew sha ka arngut ka jingbun paid kata kynthup ïa u MLA ka Mylliem Bah RV Lyngdoh.
Hynrei lada jop ka TMC kane ka party kan kiew sha ka 6 ngut ka jingbun paidbah.