Shillong, Risaw 16: Ka seng kaba don ha ka liang pyrshah ka All India Trinamool Congress (TMC) ha ka sngi Balang ka la phah ka jingujor pyrshah ïa ka National People’s Party (NPP) halor ka jingkynnoh ba ka la pynkheiñ ïa ka model code of conduct (MCC) ha kaba ka la sam ïa ki tin sopïing sha ki paidbah jong ka Gambegre constituency, ha kaba kane ka constituency ka elekshon shiteng samoi kan long ha ka 13 tarik u Naiwieng.
Ha ka shithi ba la phah sha u Returning Officer, u District Co-ordinator jong ka AITC West Garo Hills u S N Sangma u la ong ba ïa u la pyntip da ki nongtrei jong ka party haba ïadei bad ka jingpynkheiñ ïa ka model code of conduct da ki nongtrei ka NPP, kiba la sam ïa ki CGI sheets ne ki tin sopïing sha ki nongshong shnong ha kylleng jong ka constituency kum ka jingpyrshang ban khroh ïa ki nongthep vote.
“Kane ka jingpyndonkam bakla ïa ki tiar jong ka sorkar ym dei ba ka long tang kaba sniew hynrei ka long ruh kum ka kam pynbam pisa,” u la kynnoh.
“Wat hapdeng ba ka Election Commission of India (ECI) ka la dep ban pynbna ïa ka tarik ban pynlong ïa ka elekshon shiteng samoi, hynrei na ka liang ka NPP ka la ïaibteng ban leh ïa kine ki kam. Ha ka sngi Balang ruh ki la sam ïa kine ki tiar ha shnong Aminda Simsang kaba dei ka polling station no 2, wat hapdeng ba la pyntreikam ïa ka MCC. Kane ka jingleh ka la pynhiar dor ïa ka jingpynlong ka elekshon kaba khuid kaba suba,” bynrap u Sangma.
Shuh shuh utei u nongïalam ka TMC u la kynnoh ba ka NPP ka la dep ban lum lypa shibun ki tin sopïing hajan manla ki polling station, bad kane ka jingleit sam jong ki ïa kine ki tiar ka la bteng khlem sangeh.
“Halor kane, nga kyrpad ïa ka jingtuklar ba mardor jong phi ban pynsangeh ïa kane ka kam bad ban pynthikna ba ka jingpynlong ïa ka elekshon kan long kaba khuid ba suba bad ka bym shah liang,” u la ong ha ka shithi.
