Pynbna ka Chiïung ban pynkhalai biang ïa ka First Prize, la pan jingbit na u DC

Shillong, Risaw 12: Ki nongpynïaid jong ka Chiïung Multipurpose Society ha ka sngi Saitjaiñ ki la pyntip paidbah ba kum ka kynhun ki la pan jingbit na ki bor synshar District ban pynïakhalai biang ïa ka First Prize hadien katto katne sngi ba ki arngut ki samla, kata u samla lud uba la 17 snem ka rta bad u samla uba la 25 snem ka rta ki la phla paidbah ba ki dei kiba donkti ban lehtuh ha ka sngi pynkhalai ïa ka 1st Prize Lucky Draw jong ka Chi Iung Multipurpose Society kaba la long ha ka 28 tarik, Nailur, 2024.
U President jong ka Chi Iung Multipurpose Society u Bah Kynpham S. Lamurong ha ka jingïakren bad ki lad pathai khubor u la ïathuh ba ka First Prize kaba shah lehtuh ka dei da ka Truck Dumper.
U la ïathuh ba ka jingmih shakhmat jong ka Society ban pynshai paidbah halor kane ka jingjia, ka long ban aipor ïa ki arngut ki samla kiba donkti ban lehtuh ba kin pynshai paidbah halor ka kam kaba ki la leh bad hadien ba ka Society ka la mudui da ka ejahar sha ki Pulit jong ka Phramer Police Station.
Dang shen ki arngut ki samla ba donkti ban leh tuh ryngkat ka jingsynran jong u kñi ki la wan shakhmat ban panmap paidbah lyngba ki lad pathai khubor ha Shillong Press Club bad kam ruh ba ki donkti ban leh shisha ïa kane ka kam thok da ka jingthmu ban ïoh khusnam tang na ka Consolation Prize hynrei ha ka jingleh tuh ki la ïoh pynban da ka tiket jong ka First Prize ha kaba kim shym la nud satia ban kam wat ïa ka khusnam.
U Bah Kynpham u la pynshai namar ka jingbun jong ki paidbah ha kato kato ka sngi ba khalai ïa ka Lucky Draw ka Society kam banse ban ai ha ki paidbah ban ïarap khylliap ïa ki ticket bad ki dkhot ka Society ki suba dei ha kum kane ka por ba ki khynnah ki shimkabu ban tur rak rak shakhmat na ka bynta ban jied ïa ki tiket na ka bynta ban pynbna ïa ki nongïoh khusnam.
“Ha ka jingphla jong uto u khynnah u la buh ïa ka tiket ha ki shymphriah kjat bad ha ka por ba la shim ïa ki tiket u la rung beit da ka khlieh namar ha kato ka por la ïohi ïa ka tiket ba ka jhieh bad lehse ïoh dei ka jinglong ka mariang ne u buh da ki maw. Kane ka dei ka jingpynshai jong ngi na ka kynhun Chiïung bad ngi khlem pynsangeh ha kato ka por ba la lap bad kaei kaba pynlong ïa ngi ha kato ka por ka dei ba ngim lah ban bishar ha kato ka sngi hynrei donbok ba ngi leh da ka Live Video bad ynda ngi la bishar bniah ngi la rai ban ujor sha ki Pulit ban pynlong ïa ka jingtohkit ban wad ïa ka jingshisha bad da ka jingtrei shitom jong ki Pulit ngi la lap ïa ki jingshisha. Ka dei shisha ba uto u khynnah u leh tuh bad ngi ai khublei ïa ki Pulit bad ïa ki bahaïing bahasem kiba kyrshan ïa ngi ban lap ïa ka jingshisha,” ong u Bah Kynpham.
“Kum ka kynhun ngi la dom bha ïa uto u khynnah bad ka long ruh ka jingpynjah burom ïa ngi namar bun kiba la kynnoh bad kynthoh bad ka la ktah ïa ka kam ka jam jong ngi. Ngi sngewkmen ba ngi la lap ïa ka jingshisha bad lada ngi kwah ban leh tuh balei ngin leit ujor sha ki Pulit ban phah ïarap ïa ki ban wad ïa ka jingshisha bad ngin jin da lah ban shu sngap beit ha kato ka miet hynrei namar ngim kwah ba ïa kato ka khusnam kaba jop kan leit sha uba leh tuh, ka khusnam ka dei jong u paidbah ka dei ban leit sha u paidbah bad sha uto uba don ka bok ka nusip shisha. Dei na kane ka daw ngi hap ban leit sha ka aiñ ban tip ïa ka jingshisha bad ngi la ïoh ïa ka jingshisha,” u la bynrap.
Haba kylli, u la ong, “kum ka kynhun ngim don bynta eiei bad kito ki khynnah kiba leh tuh bad ngim ithuh ïa ki ruh namar ngi shu jied ïa ki napdeng ki paidbah ban shim ïa ki tiket bad ban pyni sha ki paidbah ha ka Lucky Draw bad na ka liang jong ngi kum ka kynhun Chiïung ngi la weng noh ïa ka ejahar ba ladep ujor.”