Nongstoiñ, Risaw, 12: U President jong ka Meghalaya Pradesh Congress Committee u Bah Vincent H.Pala u la ong ba ki paidbah ka Nongstoiñ Constituency kin hap ban pynkhreh lada ka wan ka elekshon shiteng samoi.
U Bah Pala uba long ruh u MP barim ka Shillong Parliamentary Seat u la kren ïa kane ha ka jingïalang ba la pynlong da ka seng Congress ha ka Market Complex New Nongstoiñ hynnin ka sngi Thohdieng.
“Ngi ladep ban ujor mokotduma pyrshah ïa ki lai ngut ki MLA jong ka party kiba la kyntiap seng bad la tikna ba ngin sa jop,” la ong u Bah Pala.
Dang shen lai ngut ki MLA jong ka Congress kiba kynthup ïa u MLA jong ka Nongstoiñ Constituency u Bah Gabriel Wahlang, u MLA jong ka Mawhati Constituency u Bah Charles Marngar MLA bad u MLA jong ka Umsning Constituency u Dr. Celestine Lyngdoh ki la leit ban pynïasoh sha ka National Peoples Party (NPP) kaba bat ïa u lakam synshar hapoh ka jylla.
U Bah Pala u la ong ba ynda ka Congress ka la jop ka mukotduma, ka Nongstoiñ Consituency ruh ka hap ban leit sha ka elekshon shiteng samoi.
U la ong ruh ba kiba kyntiap seng hi kim don nongrim eiei lait na kaba shim kabu shimet bad kim don jingieit eiei ïa ka jaidbynriew, kumba ki kam ha ki rysan ïalap elekshon.
U Vice President jong ka MPCC u Bah Ronnie Lyngdoh haba kren ha ka jingïalang u la ong ruh ba dei ka Congress kaba la wanrah ïa ki Autunomous District Council (ADC) hapoh ka Jylla bad hadien ka shakri Blei dei ka kam saiñ pyrthei kaba long kyntang namar ka khmih ïa ka ïap ka im ka jaidbynriew. Kumta ki paidbah ki dei ban phaidien bad peit bniah, namar kiwei ki seng ki shu long tang ki seng kiba kwah pynlong langkñia ïa ki paidbah.
U Bah Ronnie u la ther tyngeh ruh ïa ki lai ngut ki MLA phet seng jong ka Congress da kaba ong ba ki dei ki khun sarong awria ki bym sngewthuh shuh ïa ka nongrim lajong, hynrei ki kloi ban iehnoh ïa ka party kaba la pynjop don burom bad ïoh ïa ka jingshaniah na ki paidbah, tang na ka bynta ka myntoi shimet.
Ha ka jingïalang la donlang ruh u President jong ka District Congress Committee West Khasi Hills u Bah Bormanding Nonglang, u President jong ka Nongstoiñ Block Congress Committee u Eric Kharsyntiew bad kiwei kiwei ki dkhot.
