Tur ki Nonghikai SSA sha Secretariat ym ïoh ïa kynduh ïa u CM bad Myntri ka tnad pule puthi

Shillong, Risaw 9 : Namar ka jingbym patiaw ka Sorkar ban khot ïakren, ka synjuk ki Nonghikai SSA-ka All Meghalaya SSA School Teachers Association (AMSSASTA) ha ka sngi Balang, kala tur paidbah sha Secretariat ban pynbor ïa ka Sorkar Jylla ba kan pyntreikam noh ïa ka jingdawa pynkiew tulop ba 100%.
Kane ka synjuk ki Nonghikai SSA ka la pynlong ïa ka jingïashong kyllaiñ myngngor ba khlem pud ha Malki, kaba la jam mynta sha ka sngi kaba khyndai.
Haba ïohi ïa ka jingbym patiaw bad leh mynthi ka Sorkar ïa ka jingïakhih, ki Nonghikai SSA kila ïamih na madan Malki ban ïatur paidbah sha Secretariat hynrei ki Bor District bad ki Pulit, kila bat noh ïa ki hajan ka State Central Library bad la shah tang ïa katto katne ngut ban rung sha Secretariat.
Ka jingthmu jong kane ka Synjuk ka long ban ïakynduh ia u Myntri Rangbah ka Jylla u Conrad K Sangma bad ïa u Myntri ka tnad Pule Puthi u Rakkam A Sangma hynrei kim shym la ïoh lad ban ïa kynduh ïa ki namar ki ba dang don mynta sha Ri-lum Garo na ka daw jongka jingshah lyngshop ka ri lum Garo ha ki bor mariang na u slap bad ka eriong.
Haba ïakren bad ki lad pathai khubor, u President ka synjuk Peter Thyrniang ula ïathuh ba kane ka jingwan sha Secretariay ka dei kaba la rai da ka jingïalang ba long hynne ka step bad ki nonghikai, ki la sngewdei ban ïakynduh biang ïa ka Sorkar.
“Ka jingwan jong ngi ka long ban ïakynduh ia u Myntri Rangbah ka Jylla bad Myntri ka tnad Pule Puthi. Hynrei namar ba kim don shane, ngi la ïakynduh noh ïa u Myntri Sorkar Bah Paul Lyngdoh uba dei ruh u Nongaiktien ka Sorkar” ula pyntip.