Shillong, Risaw, 09: Ka kynhun jong ki nonghikai skul SSA kiba don hapoh ka shatri jong ka All Meghalaya SSA School Teachers Association (AMSSASTA) ha ka sngi kaba khyndai ba ki la pynlut sngi bad miet ban shong kyllaiñ myngngor ha Madan Malki, Shillong ki la leit ban aiti da ka dorkhas ha u Lat ka Jylla u Chandrashekhar H. Vijayashankar da kaba kyrpad ba un tuklar lem halor ka jingdawa ban kyntiew ïa ka tulop 100 percent.
Shwa ba kane, namar ka jingbym don jong u Myntri Rangbah ka Jylla u Conrad K. Sangma hapoh ka kamra treikam, ki nongïalam jong ka Association ki la leit ban aiti ïa ka dorkhas ha u Myntri ka Sorkar Jylla u Bah Paul Lyngdoh bad ha u nongaitbuit jong ka tnat Pule Puthi ka Sorkar Jylla u Bah Himalaya M. Shangpliang.
U President ka Association u Bah Peter Thyrniang ha ka jingïakren bad ki lad pathai khubor u la ong, “ngi la pynlong ïa ka jingïakhih mynta la khyndai sngi. Hadien ba ngi la pynlong ïa ka jingïalang bad ki para nonghikai, ngi la shim ïa ka rai ban pynbor ïa ka Sorkar ban aiti biang ïa ka dorkhas kum ka jingpynkynmaw ïa u Myntri Rangbah ka Jylla.”
Haba kylli, u la ïathuh ba ka jingïakhih ba khlem pud sngi kan dang bteng ban dawa ïa ka Sorkar ba kan kyntiew tulop ïa ki nonghikai SSA shispah na ka shispah katba ka Sorkar kam pat khot ïakren ban ïathir ïatai sani halor kane ka jingdawa.
