Nongpoh, Risaw, 08: U MLA ka Jirang u Bah Sosthenes Sohtun mynta ka sngi u la leit ban hiar hi dalade sha ka shnong Nongspung-B ban leit jurip hi dala ki jong ki khmat ïaki longiing ba shah ktah naka jingtih khyndew khlem akor jong uwei u riew shimet u ba dei ruh u Naga ha katei ka shnong.
Kitei ki longiing ba shah ktah ki kynthup ïa ka Kong Lijanta Sungoh, Kong Premika Sungoh, Kong Wompher Dhar, Kong Mana Suting, bad Kong Kerning Sungoh kiba mynta kila hap ban mih bad ban shong ban sah shawei.
Na ka liang u Bah Sosthenes Sohtun u la pynpaw ba kum u MLA hadien ka jingioh jingtip u la leit ban jurip mar mar sha katei ka jaka bad isangsot ïaki longiing bala ngat ha katei ka jingshah ktah naka jingtuid ka khyndew khamtam haka por slap, bad kum ka jingdon bynta bad kitei ki longiing bad ïarap ruh da ka song pisa.
U la ong ruh ba kum u MLA un sa ïakren ruh bad u DC ka Ri-Bhoi ryngkat u BDO halor katei ka kam khamtam ban pynioh ki lad jingïarap sha kitei ki longiing ba shah ktah.
