Shillong Risaw 07: Ka sorkar jylla sa shisien pat ka la kynnoh ïa ka sorkar Assam halor ka jingpynslem ban ïakren pynbeit pud ha ka sien kaba ar.
Halor kane na ka liang u MLA ka Nongpoh bad u dkhot ka Ri-Bhoi regional committee haba ïadei bad kane ka jingïakren ban pynbeit pud, u Bah Mayralborn Syiem, u la ong ba ka sorkar Meghalaya ka la long kaba la khreh bad ka dang ap ïa ka jingai ktien jong ka sorkar Assam.
Lah ban pynkynmaw ba dangshen u Myntri Rangbah ka jylla u Conrad Sangma u la pynpaw ba ïa ka jingïakren pynbeit pud yn sdang biang hadien jong ka shuti Puja. Hynrei na ka daw jong ka jingpang jingshitom jong u Symbud Myntri Rangbah ka jylla uba dei ruh u Chairman jong ka Ri-Bhoi district u Bah Prestone Tynsong, ka jingleit jurip ïa ki jaka bad ka jingpynlong ïa ki jingïalang bad ka Assam ka la slem noh.
Na ka liang u Bah Syiem u la ïada ruh haba ïadei bad kane ka jingpynslem, da kaba ong ba ki kam bad ki jingpynkhreh ki la ïaid hapoh ki regional committee bad ki district.
Haba jubab halor ki jingshah kynthoh haba ïadei bad kane ka jingslem ban pynlong biang ïa ka jingïakren, na ka liang u Myntri Rangbah u la pynshai ba ka jingslem halor kane ka jingïakren jong ka wat kaba ar kaba ym dei ruh kaba don kano kano ka jingduna. Ka jingïakren ha ka wat kaba ar ka la sangeh noh la palat shisnem wat hapdeng ka jingpynthikna na baroh ar tylli ki sorkar ban sdang biang ka jingïakren. U la ong ruh ba ka jingslem ban sdang biang ïa ka jingïakren kadei namar kine ki 6 tylli ki jaka ki dei kiba don ki jingma ne sensitive area.
Ha kawei pat ka liang ka seng kaba don ha ka liang pyrshah ka Voice of the People Party (VPP) ka la pynpaw ïa ka jingsngewkhia halor kane ka jingslem ban sdang biang ka jingïakren halor u pud u sam.
U Nongaiktien ka VPP u Bah Batskhem Myrboh u la ong, “Ka sorkar ha kaba sdang ka la pyni ba ka long kaba kloi da kaba kam ba kan pynbeit noh ïa u pud u sam. Ki la pyndonkam ruh ïa kane ka mat na ka bynta ban ïalap elekshon, da kaba kam ba ki la jop ha kaba ïadei bad kane ka thong.”
Shuh shuh na ka liang u Bah Myrboh u la ong, “Lada ka sorkar ka lah ban leh ïa kane, kaei kaba pynlong ïa ka ban pynslem mynta? Ngi donkam ïa ka sorkar ban treikam bha ha baroh ka samoi treikam jong ka, ym tang ha shwa ki elekshon.”
