Shillong Risaw 07: Ka jingphoh sniew jong ka sorkar Meghalaya ban don la ka jong ka medical college ka dang sah ha ka haw haw bad kam pat long kam satia.
Hynrei ka Skulbah ba shimet ka PA Sangma International Medical College of the University of Science and Technology, Meghalaya (USTM) la ong ba kan sa sdang noh shen ïa ki jingtreikam jong ka.
Lah ban ong ba dangshen ka National Medical Council (NMC) ka la ai ka jingmynjur ïa ka private medical college kaba don ha Khanapara kaba ha Ri-Bhoi district.
Na ka liang u Myntri Rangbah ruh ha ki snem ba la dep u la leit ban buh ïa u Mawnongrim ïa ka private medical college.
Ka NMC ka la ai ruh ïa ka jingmynjur ïa ka PA Sangma International Medical College and Hospital ha ka 3 tarik mynta u bnai, ban don ruh ïa kumba 150 MBBS seat na ka bynta ka snem pule 2024-25. Kane ka jingpule kan sdang ha u taïew ba khatduh jong une u bnai ha une u snem.
Ka jingmynjur jong ka NMC ka la wan tang hapdeng ki khyndiat sngi hadien ba ka medical college ka la ïohpdiang ïa ka jingmynjur na ka Union Health Ministry.
Lah bun bun snem ka sorkar jylla ka la pyrshang ban shna noh la ki jong ki medical college ha Shillong bad Tura.
Ka jingslem ban shna ïa kine ki artylli ki medical college jong ka sorkar ka la wanrah ka jinglehraiñ ïa ka jylla naba katei ka jaka pule doktor kaba shimet ka la sdang ban treikam mynta.
Lah ban ong ba mynta ka sorkar ka la pyrshang ban shna noh ïa ka Shillong Medical College kaba la buh ïa ka thong ban sdang noh ha u snem 2025-26.
Kawei na kine ki jaka pule doktor jong ka jylla kan don ruh ha Tura, Garo Hills. Ïa kane ka college la buh ruh ïa ka thong ba kan sdang noh ha u snem 2027.
Ka Myntri ka Koit ka Khiah ka kong Ampareen Lyngdoh ka la ong ba ka sorkar ka la buh ïa ka thong ban plie noh ïa ka Shillong Medical College ha u snem 2025.
Katkum ka jingong jong ka, ïa ka Tura Medical College la khmih lynti ban pyndep ha u snem 2028.
Lah ban ong ba dangshen na ka liang u Chancellor ka USTM u Mahbubul Hoque u la kyrpad ïa ka sorkar ban ai ram kaba khlem shim sut kaba la kot kumba T. 233 klur na ka bynta ka PA Sangma International Medical College and Hospital.
U Hoque u la ong ba ïa kane ka ram yn sa siew noh hapoh ki 20 snem.
Ym lah ban tip la ka sorkar kan mynjur ne em ïa kane ka jingkyrpad hynrei katkum ki heh ophisar pat ki la ïathuh ba ïa kane ka kam na ka liang ka sorkar ka dang khmih bniah da u Myntri Rangbah.
