Shillong, Risaw 02: Ha ka high-level meeting jong ka tnat Pule Puthi, u Myntri khynnah ka Sorkar Pdeng ba khmih ïa ka pule puthi u Jayant Chaudhary, bad u Myntri ka tnat Pule Puthi ka jylla u Rakkam A. Sangma ki la ïakren bad ïasyllok haba ïadei bad ka jingpyntreikam ïa ki skhim ka sorkar pdeng, ba kynthup ïa ka amagra Shiksha Abhiyan (SSA), ka Pradhan Mantri Uchchatar Shiksha Abhiyan (PM-USHA), ka National Education Policy (NEP), bad ka Rashtriya Uchchatar Shiksha Abhiyan (RUSA).
Ha ka jingïalang la banjur halor ki kam kiba la mad da ka jylla ha ki kam ka pule puthi khamtam kiba donkam kyrkieh ban pynbiang ïa ki lad jingtei ïa ki skul bad ban pynduna ruh ïa ka jingpep skul shiteng por ki khynnah. Halor kane u Chaudhary u la banjur halor ka jingdonkam ban kyntiew ïa ki secondary bad senior secondary education ban kyntiew ïa ka jingwan rung skul kaba ïadei bad ka jingthmu ka NEP, haba baroh arngut ki Myntri ki la ithuh ïa ka jingkiew ka kam pule puthi ha ka jylla.
Ki don bun ki kam ban kyntiew ha ka pule puthi, pynpaw ka jingïalang kine ki myntri. Na ka liang u Mynti ka sorkar pdeng u la ïaroh ïa ka jingpyrshang ka jylla ban pyntreikam ïa ka National Education Policy. “Ngi la khmih ruh ïa ka jingpyntreikam jong ka National Education Policy,” ong u Chaudhary.
U la kren shaphang ka jingkyrshan ka sorkar pdeng lyngba ka Samagra Shiksha ban peit halor ki kam jingtei kum ka jingpynbiang bording ha ki skul. “Hapoh ka Samagra Shiksha, ka sorkar pdeng ka ai ka jingkyrshan ban pynbiang ïa ka bording ha ki skul,” batai u Chaudhary.
Haba bynrap u Chaudhary u la ïaroh ïa ka jingai jinghikai ïa ki nonghikai ba la pynlong da ka jingïatreilang bad ka IIM Shillong.
Na ka liang u Myntri ka tnat pule puthi ka jylla u Rakkam A. Sangma, u la ïathuh ba ha u snem ba la dep ka tnat ka la lah ban pynthymmai ïa kumba 2,044 tylli ki ïing skul bad palat spah tylli la ïeh na ka bynta ka Mission Education initiative. Ka tnat ka thmu ruh ban tei biang bad ban pynthymmai ïa baroh ki skul sorkar hapoh ki 2 ne 3 snem da kumba 5 spah tylli ki skul kiba dang ap ban pyndep.
