Shillong, Risaw 02: Kum shibynta ban ratdyngkhong ïa ki kam sniew kiba la sdang ban kynrei hapoh ka constituency, u MLA ka BJP na South Shillong Bah Sanbor Shullai ula pynbna ba un sa thaw ïa ka Committee ka ban khmih bad leh eiei halor ka jingnang jyllei jong u drok hapoh ka constituency jong u kaba la sdang jur ha kine ki sngi.
U la ong ba kane ka Committee kan kynthup ïa ki nongmihkhmat na ki Dorbar Shnong, ki Village Council bad kiwei ki kynhun bapher bapher.
Ha kaba ïadei bad kane haba ïakren bad ki lad pathai khubor hadien ka jingïalang bad ki heh Pulit bad ki kynhun bapher bapher ha Jhalupara Community Hall, u Bah Sanbor ula ong, “Ngin sa thaw ïa ka Committee bad ngi sa jied ïa ki dkhot na ki Dorbar Shnong, Village Council bad ki kynhun bapher bapher bad ngin saphah bad ai jingmut ïa ki kyrteng sha ka Sorkar”.
U la ïathuh da kaba ong, “Dangshen ka Sorkar Jylla ka la thaw ïa ka Committee ban khmih ïa ki jingjyllei u drok. Nga ruh ngan saphah ïa ka kyrteng na ka Shillong Contonment Area ba kin ïoh rung dkhot ha kane ka Committee ba thaw ka Sorkar.”
U ong ba kane ka sienjam ka dei kaba shim hadien ka jingshah kem ka snar khaiï drok napoh ka thain Polo dangshen kaba pynïaid ïew ïa u drok na Paltan Bazaar.
U Bah Sanbor ula ban jur ïa ka jingkongsan ka jingïatreilang hapdeng ki kynhun ba ïadonbynta bad ki jingai jingmut jong ka Committee ki ban saphah sha ka Sorkar Jylla na ka bynta ban shim ïa ki sienjam ba donkam ban leh eiei halor kane kam.
Nalor ka jingïakhun pyrshah ïa u drok, kane ka jingïalang ka la ïakren ruh halor ki jingsngewkhia na ka jingwan rung ki briew ki bym ithuh ithaw ha ka thaiñ bad ban jur ba baroh ki briew ki bym dei ki nongshong shnong ka thaiñ, ki dei ban don ïa ki kot ki sla kynthup ïa ki Verification certificate na ki Pulit ba kin ïoh sah da ka jingithuh ka aiñ.
Shuh shuh halor kane u MLA ula maham ïa kino kino ki nongshim wai ki bym pynbiang ïa ki jingdonkam baroh lane kiba ai jaka rieh ïa ki riew bymman, ba kin mad ïa ki jingpynshitom kaba tyngeh katkum ka aiñ.
