Kyntu ka Synjuk Waheh Chnong Jowai ban nym pynlong Online Housie ha ki sngi Fete ki DS

Jowai, Risaw 02: Ka Synjuk Waheh Chnong Jowai, ha ka jingïalang kaba dang shu dep, ka la rai ban pyntip lyngba kane ka khubor ha ka jingïadei bad ka jingktah ka Online Housie ha ka por ba pynlong ïa ki Fete jong ki Dorbar Shnong hapoh ka sor Jowai.
Ka Synjuk Waheh Shnong Jowai, kam shym la ong ba ka pyrshah ïa kino kino ki jingtrei ne ka kamai kajih jong kino kino hapoh ka shnong ka thaw. Hynrei ka buh ka jingkyrpad haba pynlong ïa ka “Online Housie” kin sngewbha ban ïatreilang bad ki Dorbar Chnong da kaba pynpher por ne pynsangeh ïa ka jingïalehkai jong ki, ha ki ba sngi pynlong Fete hapoh ka nongbah Jowai.
Namar katkum ka jinglap jong ki Dorbar Shnong, ha ka por ba don ka Online Housie, lada don ki Housie Fete, la ïohi ba ka ktah shisha, namar ba kiba bun ki ïabeh ïa katei ka online Housie na ka daw ba ka dor ka kham tad bad kaba pynsuk ban ïalehkai namar ki lah ban ïaleh na la ki ïing ki sem jong ki.
Kumta ka Synjuk ka buh kane ka jingkyrpad na ka bynta ki Dorbar Shnong, khlem da kdew ïa kiwei pat ki seng ne ki riew shimet kiba pynlong Fete. Kumta na ka liang ka Synjuk Waheh Shnong ka kyntu ïa baroh ban iatreilang bad ka Synjuk na ka bynta ka bha ka miat baroh lang.
La pyntip ba kine harum ki dei ki tarik pynlong Fete ki Dorbar Shnong ha Nongbah Jowai ka DS Mynthong haka 04 Oct 2024. Tpep Pale haka 10 & 11 Oct. 2024, Chutwakhu haka 17 & 18 Oct 2024, Lion Mission Compound haka 24 & 25 Oct 2024, Khim-u-sniang haka 31 Oct & 1 Nov 2024, Ladthadlaboh haka 7 & 8 Nov 2024, Dongmihsngi ha ka 3 & 4 Dec 2024, Loomsooyung Newhill ha ka 5 Dec. 2024, Chiliangraij haka 6 & 7 Dec 2024, Moosalyngkat haka 11 & 12 Dec 2024, Panaliar haka 13 & 14 Dec 2024, Loompyrdi Iongpiah haka 20 & 21 Dec 2024, Loomiongkjam haka 26, 27 & 28 Dec 2024 bad ka Dulong haka 13, 14 & 15 March 2025.