Don ruh kiba khlem thoh eksam ki paw ha ka thup kyrteng ka kam nurse bad ANM

Shillong, Risaw 01: Ka Hynñiewtrep Youths Council (HYC) ha ka sngi baar ka la dawa na ka Sorkar Jylla ban thung da ka kynhun tohkit kaba laitluid halor ka jingkynrum kynram ka rukom pynbna result thungkam Staff Nurse bad ANM kaba la mih ha kine ki sngi.
Ha kaba ïadei bad kane haba kren sha ki lad pathai khubor u President ka HYC Bah Roy Kupar Synrem u la ban jur ruh ba donkam ban pynshitom ïa kiba donkti pynbna ïa ka result naba kane ka la ktah shibun ki samla wad kam ka jylla.
Na ka liang u Bah Roy u la ong ba ka long kaei kaei kaba sngew thamula ban ïohi ba dang don ki jingbakla ha ka thup Result wat hadien ba la pynmih ïa ka thup haduh laisien.
“Dei ban thung da ka jingtohkit bad ym dei ban tohkit da ka tnat ka koit ka khiah hynrei lada long kaba lah, dei ban thung da ka Judicial Inquiry ba khlieh da u Session District Judge ne ki Judge ba la shongthait,” ong u Bah Roy.
Shuh shuh u Bah Roy u la kynthoh ba kane ka jingbakla ka la pynduh mynsiem ïa ki samla kiba wad kam namar wat da kaba pyndonkam da ki OMR Sheets ruh ka dang bun ka jingbakla.
U la kynnoh ruh ba ka seng ka la ïoh jingtip ba wat kito kiba khlem leit thoh ïa ka eksamin ki paw kyrteng ha ka thup, ha ryngkat u Roll Number bad ka Marks ba ïoh bad u la buh jingkylli da kaba ong, “U briew ba khlem leit thoh eksamin, kumno u paw kyrteng bad ki Marks ba u ïoh.”
Nalor kane u President ka HYC u la ong ba ka tnat ka koit ka khiah ka dei ban pynsangeh shwa ïa kane ka jingthungkam Staff Nurse bad ANM kat bym pat pynbeit ïa ki jingbakla kiba la wanrah ka jingartatien ïa ka rukom treikam jong kane ka tnat ka Koit ka Khiah.