Kwah ka sorkar ia ka jingkyrshan jong ka 16th Finance Commissiong ban pynïaid shakhmat ïa ki kam

Shillong, Nailur 30: U Myntri Rangbah ka jylla u Conrad K. Sangma ha ka sngi Thohdieng u la ong ba ka sorkar ka la ithuh ïa ki jingeh kiba long ki diengpynkiang ba ktah ïa ka roi ka san jong ka jylla.
“Ngi la lap ïa ki jingeh bad la shem ïa ka lynti ban weng ïa kine ki jingeh kiba ktah ïa ka roi ka san ha ki kam bapher bapher ha ka jylla,” ong u Myntri Rangbah ka jylla haba kren ha ka XVIth Finance Commission ha Shillong.
Haba ong ba kane ka sorkar kaba mynta ha hap ban shimti ïa kiba bun ki jingïakhun na ki kam ba la iehshrah jong ki snem ba la leit noh, u la ong, “Ha kiba bun ki kam ngi la lah ban leh bha khamtam ha ka Koit ka Khiah bad ka pule puthi, ngi shim ïa kine ki jingïakhun, la ithuh ïa ki jingsngewkhia bad mynta ki la lah ban pynbeit ïa kine ki jingeh jong ngi ha ka rukom treikam kaba dei”.
Haba kdew halor ka Maternal Mortality Rate (MMR), kaba la long arshah ban ïa ka national average ha u snem 2018, u Myntri Rangbah u la ong, “Ngi la pynmih ïa ka prokram MOTHER haba ngi ithuh ïa ki longkmie ba armet kiba don hapdeng ka jingma, bad ban wad ïa ki lad ha kaba ïadei bad ka jingai jingsumar na ka bynta ban pynkha khun ha ki jaka sumar ne ki aspata”.
“Ka Maternal mortality ka don ka jingïasoh bad ka kam imlang sahlang, ki kam jingtei bad kiwei pat ki kam shakri, kaba kynthup ruh jingjlan por ïa ka jingkha khun kaba long hapdeng 2 ngut ki khyllung,” u la bynrap, haba kren shaphang ki kam ban tuklar, kaba la sdang lyngba ka Chief Minister’s Safe Motherhood Programme.
U la ïathuh ba ka sorkar ka la lah ban pynbeit ïa ki jingeh bad ban pynmih ïa ki sienjam ban pynbeit kaba la lam sha ka jinghiar ka MMR bad IMR ha ka jylla.
Haba buh ïa u mawnongrim na ka bynta ki kam pynroi, u Myntri Rangbah u la ong ba lyngba ka XVth Finance Commission, ka la jylla ka la ïoh T. 3000 klur, bad lyngba ka Externally Aided Projects (EAPs), ka jylla ka la lah ban ïoh ka jingbei tyngka kumba T. 9000 klur, ban sdang ïa ki kam pynroi bad ki projek jingtei.
“Lyngba ki jingïatreilang kaba ngi pynïaid bad ki international bank, ki institution, ki university kum ka Berkeley, ka jylla ka la lah ban kynthup ïa ki riew shemphang bad ka jingïadei paralok ha ki kam technology ban sam ïa ki jingthmu ban kyntiew shuh shuh ïa ka roi ka san bad ka jingkiew jong ka jylla,” u la banjur.
Haba aiti ïa ka dorkhas jong ka jylla sha u Chairman ka XVIth Finance Commission u Dr. Arvind Panagariya, u Myntri Rangbah u la kren halor ka jingdonkam jong kane ka jingïalang bad jingkyrshan na ka Commission, ka ban pynlah ïa ka jylla ban bteng ïa ka kam ban pynïaid shakhmat ïa ki kam pynroi ha ka jylla.
“Ngi khmih lynti sha ka XVIth Finance Commission kan pdiang lem ïa kane ka dorkhas bad ban kyrshan ïa ngi khnang ban lah ban pynïaid beit ïa ki jingangnud jong ka jylla Meghalaya,” bynrap u Myntri Rangbah.