Shillong, Nailur 30: U Myntri Khynnah ka Sorkar Pdeng uba peit ïa ka Skill Development and Entrepreneurship (Independent Charge), u Jayant Chaudhary, ha ka sngi Nyngkong, ula leit ïakynduh ïa u Lat ka jylla u C.H. Vijayashankar ha Raj Bhavan, Shillong.
Katkum ka khubor ba la phah la ong ba ha kane ka jingïakynduh, u Myntri Sorkar ula ïakren bad u Lat halor ki sienjam kiba kongsan na ka bynta ban kyntiew ïa ki lad ki lynti kiba ïadei bad ki kam ki sap ki phong (Skill Development) bad ki jingsengkam lajong (Entrepreneurship) ha ka jylla Meghalaya.
Halor kane u la batai ruh shaphang ki skhim ka sorkar pdeng kiba dang ïaid shakhmat ban pynkup bor ïa ki samla khamtam ha kaba ïadei bad ka sap ha ka die ka thied, ka jingthaw ïa ki lad ban aikam aijam bad ban kyntiew ïa ka jingseng kam lajong ha ka thaiñ baroh kawei.
Ha kaba ïadei bad kane na ka liang u Lat ka jylla ula ai khublei ïa ka tnad jong ka sorkar pdeng kaba la pynleit jingmut ha ka ban ai jinghikai ban pyntbit ïa ki samla khamtam eh na ka Meghalaya, ha kaba ka don bha ka lad na ka bynta saiñdur ïa ka sap ha kiba bun ki liang kum ka rep ka riang, ka kam jngohkai bad ka kam thaiñ jingthaiñ tynrai.
U la pynpaw ruh ïa ka jingkongsan ban tei ïa ka sap ka phong na ka bynta ban kyntiew ïa ka roi ka san bad ka ïoh ka kot bad ban pynbiang ïa ki samla ïa ki lad ban kamai jakpoh bad ula banjur ruh ha kaba ïadei bad ka Agro-bases Industries bad Textile.
La ong ba kane ka jingïalang ka la kut da kaba ïaid beit ïaid ryntih bad kaba sngewtynnad ha kaba ki la shim ïa ka jingkitkhlieh ban pynkup bor ïa ki samla ïa ki paidbah bad ki samla ka jylla Meghalaya lyngba ka Skill Development bad Entrepreneur.
