Bishar ka Myntri kam pla tyngka ka sorkar pdeng ïa ka jingtreikam ki 7 tylli ki Regional Rural Bank ha thaiñ shatei lam mihngi

Itanagar, Nailur 30 : Ka Myntri Sorkar Pdeng ba dei khmih ïa ka Tnad Kam Pla Tyngka Nirmala Sitharaman, ka la sdang ïa ka jingleit jong ka kaba lai sngi sha Arunachal Pradesh mynta ka sngi da kaba pynïaid ïa ka jingïalang ha Itanagar. La pynlong ïa kane ka jingïalang ban peit ïa ka jingtreikam jong hynniew tylli ki Regional Rural Bank (RRB) kiba treikam ha ka thaiñ shatei lam mihngi ha ki jylla Arunachal Pradesh, Assam, Manipur, Meghalaya, Mizoram, Nagaland, bad Tripura.
Ha kane ka jingïalang la wan ïashim bynta da u M. Nagaraju, Secretary, ka tnad Financial Services, ha ryngkat ki ophisar na ki tnad Kam Pla Tyngka jong baroh ki jylla ka thaiñ shatei lam mihngi bad ruh ki khliehduh jong ki bank ba ïashim bynta. Ki ophisar na ka RBI, NABARD, SIDBI, bad kiwei kiwei ruh ki la ïadon lang ha kane ka jingïalang.
Ha kane ka jingïalang, ki jingïakren ki la long halor ka jingkyntiew ïa ka jingtreikam, ka jingkyntiew ïa ki jingai jingshakri lyngba ka digital teknoloji, bad ka jingkyntiew ïa ka jingkiew ki kam khaïi pateng kiba ïadei bad ka kam rep bad ki kam MSME. Ka Myntri ka la kren shaphang ka bynta kaba khraw jong ki RRB ban kyrshan ïa ka ïoh ka kot ha ki jaka nongkyndong bad ka la kyntu ïa ki, bad ki bank kiba ïarap ïa ki, ba kin peit bniah ïa ka jingwad ïa kito kiba dei ban ïoh jingmyntoi na ki skhim ba kyrpang jong ka Sorkar India, ba kynthup ruh ia ka PM Vishwakarma.
Shuh shuh, ka Sitharaman ka la bthah ïa ki RRB ba kin kyntiew ïa ka bynta jong ki ha ka jingai ram na ka bynta ki kam rep, ha ka jingpeit kham bniah ïa ka kam horticulture bad kiwei kiwei ki kam kiba ïadei bad kane kum ka jingri sniang, jingri syiar, ki kam kiba ïadei bad ka dud bad ka jingri dohkha, khnang ban kyntiew shuh shuh ïa ki lad kamai jakpoh ha ki jaka nongkyndong.
Ha ka sngi ba ar ba kan don ha Arunachal Pradesh, ka Myntri ba dei khmih ïa ka tnad Kam Pla Tyngka kan leit jngoh ïa ka Namsai, ha kaba kan plié paidbah ïa ka SBI Regional Business Office ba thymmai, ha ryngkat kiwei kiwei ki kam kiba thmu ban kyntiew ïa ka jingioh bynta ha ki kam pisa bad kiba plié lad ia ka jingkiew ka ioh ka kot ha kylleng ka thain shatei lammihngi.
Ha ka sngi kaba khatduh jong ka jingleit jngoh ka Myntri ïa ka Arunachal Pradesh ha ka 2 tarik u Risaw, ka Nirmala Sitharaman kan iashim bynta ha ka prokram Swachhata Hi Seva ha Namsai. Kane ka jingïashim bynta ka dei ka dak jong ka jingkut jingmut ka Sorkar na ka bynta ka jingkhuid jingsuba bad ka bha ka miat jong ka imlang sahlang kum shi bynta ka kamkaba dang ïaid ha kylleng ka ri.