Shillong, Nailur 29 : Kam pher lada phi don sha shilliang duriaw ruh lada phi don pat ka mon kaba skhem ban pynneh bad burom ïa la ka tynrai kata la ka long ha ka ktien ka thylliej, ka riam ka beit bad ruh wat haba ïadei bad ka burom ka akor kaba ka Jaidbynriew Khasi ka niewkor bha.
Kawei na ki nuska kaba paka tam ka dei shaphang kawei ka longkmie kaba dei na Shillong hynrei kaba sah pat mynta sha Ireland bad don ruh arngut ki khun kynthei ba dang rit. Kane ka longkmie kadei ka Kong Phida Sohtun Kerr bad ki arngut ki khun pat ki dei kiba la ai kyrteng da i Eleni bad i Tiana Sohtun Kerr.
Kaba sngewtynnad ka long ba kane ka longkmie ka ju pynlut por bad ki khun ban hikai kren bad pule Khasi. Ym katta, ka video ba ki buh ha social media kaba pyni ha ka por ba ka hikai Khasi ïa ki, ka la khring bun bha ki nongpeit bad jan baroh ki la ai jingïaroh ïa kane ka longiing kaba khlem klet noh ïa ka tynrai watla ki don sha ri nongwei.
Haba phai sha ka Kong Phida, kane ka Longkmie kadei ka khun jong i Kong Rida Sohtun bad i Bah Marvin David Giri (Bam Kwai ha Dwar u Blei). “Mynshwa ngi sah ha Nongshilliang Nongthymmai. Katba i kurim jongnga pat i kyrteng i Kevin Kerr bad i dei na Ireland bad nga ïa kynduh ïa i ha Mumbai namar mynshwa ngi ïa treilang ha kajuh ka skul ka International School,” ka la ong.
Nangta la ïathuh ruh ba ha shwa ba kin wan sah ha Ireland ki la sah shwa ha Qatar, Doha la kumba phra snem ei ei bad ki khun ki la heh la san hangtei. “Shwa kane, ngi sah ha Mongolia hynrei ki khun ki dang rit bha bad kim pat kynmaw bha,” la ong ka Kong Phida.
La ïathuh ruh ba ki la mih na Mumbai ha ka por ba i Eleni i dang don tang kumba shi snem ei ei te kumta ka la ong ba in ym pat da kynmaw ïa ka Mumbai.
Halor ka jingkylli, kane ka longkmie ka la ïathuh ba kim pat ju sah ha Meghalaya hynrei ki shu wan shuti bad sah kumba shi bnai ei ei, kata shisien ha ka arsnem.
Shwa kane, ka Kong Phida ka la ïathuh ba kam long satia kaba suk ban hikai Khasi ïa ki khun ha ri nongwei namar naduh habar haduh ha kut la ïa kren beit da ka ktien English, “Naduh skul, haduh dukan, ki paralok parajor, marjan marpa bad ha ki jaka baroh la ïa kren lut da ka ktien English. Kumta, tang marwei nga la pyrshang ban hikai khyndiat khyndiat ïa ki ba kin nang ïa ka ktien lajong,” ka la ong.
Ban pynsuk shuh shuh ïa ki ba kin nang kloi ïa ki kyntien bad ruh ba kin sngewthuh ïa ka jingmut jong kano kano ka kyntien, ka Kong Phida ka la ïathuh ba ka thied ïa ka Dictionary Khasi ba la thoh da u Nissor Sing haka por ba ka wan sha shuti sha Shillong.
Na ka liang kitei ki khun kynthei ki la pynpaw ba ki kwah ban nang bha tiak tiak ïa ka ktien Khasi khnang ba ynda ki la wan shuti biang sha Shillong kin sa lah ban kren lang kumba kren ki bahaiing ha sem khlem da teh teh shuh.
