Shillong, Nailur 24: Mynta ka sngi ki nongtrei ka Shillong Municipal Board ki la pynkhuid ïa ka wah Umsohsun kaba la sahkut da kiba bun ki ñiut ki ñier kaba la pynjaboh ïa kane ka wah ha ryngkat ka jingsma iewtung.
Ki shnat wah kiba tuid sha kane ka wah Umsohsum ki don lai tylli, kawei ka wan na Ketting Road, kawei ka wan na ophis ka Cantonment Board bad kaba na Ïewduh, ki dei ki jaboh ki ban wan tuid na kine ki jaka bad khamtam na ïew.
Ka wah kaba tuid na Keating road ka wan sha Umsohsun, kaba na Ïewduh ka ïaid na Themmetor sha Umsohsun, ka um jaboh baroh na Ïewduh ka tuid sha kane ka wah Umsohsun bad ka poi sha Wahingdoh.
Na ka liang jong ki ophisar ka SMB ki la phah ïa ka kaiphod sha ka ophis ban ïada na ka jingtuid ki jaboh sha kane ka wah ba la donkam ban buh ïa ki jingker ha kine ki wah ba ki jaboh ki sah kut bad kan ïaid tang ka um.
Kane kan ïarap ban pynkhuid ïa ka wah Umkhrah bad ha kaba kut kan ïada ïa ka pung Umïam, kane ka dei ka jingpyrkhat ban ïada na ki jaboh ban tuid hapoh ki wah bad ha ka juh ka por donkam ïa ki briew ban pynkhuid.
