Don tang 150 ngut ki pulit pynïaid kali ban peit ha baroh 7 Polling Station
Halor ka dheng kali kynduh ka State Planning Board
Shillong, Nailur 23 : Ka Meghalaya State Planning Board (MSPB) ka la rai ba shen kan aiti ia ki jingai jingmut ba bniah sha ka sorkar jylla na ka bynta ban weng ïa ka jingdheng kali kaba nang kiew man ka sngi ha ka nongbah Shillong.
Haba kren sha ki lad pathai khubor hadien ba la wai ka jingïalang halor kane ka ishu, u Chairman ka MSPB Bah Metbah Lyngdoh u la ong, “Hadien ka jingïakynduh ïa baroh ki tnad ba dei lang, ngin sa pynkhreh pat ïa ka jingai jingmut ba bniah sha ka sorkar jylla na ka bynta ban leh ïa kaba donkam ban weng ïa ka jingeh jong ka jingkhapngiah kali ha ka nongbah Shillong.”
U la pyntip ha ka jingïalang mynta ka sngi, ki tnad sorkar ba kynthup naduh ka tnad Urban, PWD, Police bad Transport ki la batai bniah ïa kiba bun ki jingeh bad ki mat bapher bapher kiba ki ïakynduh ryngkat bad ki jingai jingmut.
Katkum ka jingong jong u Chairman, na ka liang ka Board kan ïai bteng ban ïakynduh ïa ki tnad bapher bapher ha ki sngi ban wan bad ka jingïalang kaba ar ka lah ban long biang hapoh shi taiew ei ei.
“Ka kamram jong ka board ka long ban ai jingmut sha ka sorkar kumno ba kan shim ïa ki sienjam. Ka jingialang mynta ka sngi ka long ban ïohsngew shwa tang na kitei ki saw tylli ki tnad bad hadien kane ngin sa shim pat ïa ka jingai jingmut na kiwei pat ki tnad bad hadien kane ngin sa lah ban ai jingmut bad pynkhreh ïa ki jingai jingmut kiba bniah,” la ong u Lyngdoh.
Ha kajuh ka por u Chairman ka Board u la ong ba ki dep ban ai jingmut ïa ka sorkar ban thung kham bun ki pulit pynïaid kali khnang ban lah pynduna ïa ka dheng kali.
“Ha ka jingïalang ka tnad pulit ka la kdew ïa ka jingeh na ka daw ka jingduna ki nongtrei. Ki don tang 150 ngut ki ba la buh na ka bynta ki 7 tylli ki thanat pulit. Kumta kane ka dei ka bynta kaba nyngkong eh ban pynbeit,” u la ong.
Shuh shuh u ong ba kin sa ai jingmut ruh ïa ka sorkar lyngba ka tnad Kampohiing ba kan mang kham bun shuh ki pulit ban trei ha katei ka kam. “Kumba ka long mynta ki don tang 100 ngut bad ki don haduh 400 ngut ki homeguard. Kumta ngim lah ban khmih lynti palat na ki homeguard. Kumta na ka liang ka tnad Pulit ka la pynthikna ban pynbeit ïa kane mardor.”