Ha ki bynta ba sha khmat ngi la ïohi kumno ka pule puthi ha ka jylla ka long naduh school haduh ka kyrdan college. Ha kane ka sien pat ngin ïa peit ïa ka jinglong jingman jong ka pule dangle ha ki skulbah kiba don ha ka jylla Meghalaya. Ka kyrteng ‘Educational Hub of Northeast India’ ïa kaba la ai nam ïa ka Shillong ka dei ruh namar ka jingdon jong ki University ba paw ha ka nongbah khamtam eh ka NEHU (1973), ki University kiba dei jong ki riewshimet ne kynhun kiba la seng ha Shillong bad ha kiwei ki District ki kynthup ïa ka English and Foreign Languages University – Shillong Campus (1973), IGNOU – Shillong Regional Centre (1988), Martin Luther Christian University (2005), ICFAI University (2005), William Carey University (2005), Techno Global University (2008), University of Science and Technology (2008), CMJ University (2009), Mahatma Gandhi University (2010), University of Technology and Management (2010), MIT University (2011) bad ka North East Adventist University (2015). Nalor kine ki don ruh ki jaka pule ha ki Professional Courses kum ka North Eastern Indira Gandhi Regional Institute of Health and Medical Sciences (1987), Indian Institute of Management (2007), National Institute of Technology (2007) bad ka National Institute of Fashion Technology (2008).
Haba ngi peit kumne ïa ka jingdon kine ki jaka pule ba kham halor ngim sngew lah ngeit ba ki khynnah pule jong ngi kiba la pyndep ïa ka Degree na ki college kin jynjar ban ïoh pat ban bteng ïa ka jingpule ha ki Master Degree/Post-Graduate, lane wat ha ki Professional lines. Hynrei kata ka dei ka jingshisha ba kiba bun na ki khynnah pule kiba dei ki trai jylla kiba kynthup ïa ki Khasi bad Garo kim ïoh lad satia ban pule ha kitei ki University namar ki daw kiba bun. Kawei ka long ka jingduna seat palat ha NEHU kaba baroh ki ïa beh namar ka dei tang ma ka hi ka Central University ha ka jylla bad ka don ïa ka Campus ha Shillong bad ha Tura bad kaba ar pat ka jingrem dor palat ka jingsiew ha kitei kiwei pat ki University kat haduh ba ka la pynlong ïa kiba bun ba kin sangeh noh tang ha ka Degree level. Kawei pat ka daw ka dei ka jingbym lah kot bor ki khynnah ban ïa tynjuh bor bad kiwei pat ki khynnah kiba wan na kiwei ki jylla namar ka jingbym lah ban ïoh ïa ka percentage kaba biang katkum ka jingdawa jong ka juk mynta.
Ha ki snem kiba la leit ki dang don hi ki khynnah trai jylla kiba ïoh rung ha University namar ka don ka written bad personal interview ba ju pynïaid hi da ki Department kiba don ha NEHU. Kane ka wanrah ïa ka jingryntih lane uniformity ha ka rukom pynrung klas bad tang kita kiba pass ïa ka written bad personal interview ki ïoh ïa ka seat. Kane ka ailad ïa baroh ba kin ïoh ïa kajuh ka kabu ban ïoh seat bad ka jingjied ruh ka long khlem leh shiliang khmat ïano ïano, hynrei ka dei beit katkum ka jingtbit jong ki nongïakhun namar ïa ki kyrteng bad ki marks ba ki ïoh la pyni paidbah khlem kano kano ka jingbuhrieh. Hynrei kaba ktah ka long haba ka NEHU ka la pynïaid ïa ka admission da kaba shu pynshong nongrim beit na ki marks ba ïoh ha college ha kaba bun hi na ki khynnah trai jylla ki shem jingeh ban ïoh ïa ki marks lane percentage kumba long kiwei pat kiba wan nabar jong ka jylla. Mynta pat ka NEHU ka la pynïaid ïa ka admission lyngba ka jingbthah jong ka sorkar pdeng bad kata ka dei lyngba ka CUET. Kumba long mynta kiba bun na kiba ïohrung ha NEHU ki dei kiba na shabar namar kane ka dei ka test kaba kynthup ïa ki khynnah baroh kawei ka ri India. Naduh ba la pynmih ïa ka CUET ngi dang lah ban niew katno ngut napdeng ki trai jylla kiba ïoh rung klas ha NEHU wat hadien ba la ai ïa ki ïa ka percentage kaba dei ka bhah ba la bynta da ka University. Hynrei bun ngim pyrwa ïa kane namar ngim ïohi da la ki khmat ïa ka jingktah jong ka lane ngim kwah ban pdiang ba kane ka jia ha kane ka skulbah kaba don ha ka jylla. Ka por ka la dei eh ban wad ïa ka daw balei ka jia kumne bad ban wad ki lad kumno ban ïarap ïa ki khynnah ba kin ïoh ban kynjoh sha ki kyrdan pule ba hajrong ha ka skulbah.
Kum ban shu kdew hangne ba kawei na ki daw ba ki khynnah jong ka jylla kim lah shuh ban ïakhun ïa ki examination ne ki written test ha ka national level ka dei namar ka jinghiar ka pule puthi ha college. Kiba bun na ki khynnah ba pass na college kim lah satia ban ïakhun ïa ka written test ha University namar ka jingpule ha college kam ïarap satia ban pynkhreh ïa ki ba kin lah ban ïakhun. Kumba la kdew ha ka “Bynta ba Lai”, ka course na ka bynta jong ki ka la ïar kat haduh ba ym lah shuh ban hikai ha ka rukom kaba dei ka ban ïarap ïa ki ba kin ïakhun ïa ki examination bapher bapher ban leit pule kham shalor. Kumta ruh ngi shem ba kane ka jingtlot naduh na skul haduh college ka pyntroin ïa ka jinglah jong ki khynnah ban pynkhreh ïalade ban ïakhun ïa ki civil service examination ne ki examination thep kam ki bapher bapher. Ka Jingktah kam dei shuh tang ha ka Post-Graduate level hynrei wat kiba pule Ph.D. ruh ki duna bha na ki trai jylla bad ha kaba ïadei bad kane ka bynta ruh ngi dei ban wad ïa ki daw balei ka jia kumne.
Haba ngi phai pat sha ka jinglong jingman jong ka University kum ka NEHU ngi lap ba kane ka skulbah ka la nang hiar na kawei sngi sha kawei pat. Hoid ngim lah ban len ba kane ka University ka la ai ka jingshakri kaba khraw haduh katta katta ym tang ïa ka jylla hynrei ïa ka thian Northeast India mynta la 50 snem tam. Hynrei ka long ka jingbynniaw ban ïohi ba kum kawei na ki skulbah ba heh ha ka thaiñ mihngi jong ka India, kane ka skulbah kam shym lah ban kot ha kiba bun ki bynta kumba long kiwei ki skulbah kylleng ka ri. Kumba 20-25 snem mynshwa ka NEHU ka la ïoh ban bat ïa ka kyrdan University with Potential for Excellence la bun snem. Bad haduh u snem 2016 ka long ba 15 bad ha u 2019 ruh ka dang poi ba 39. Phewse mynta u snem 2024 ka NEHU katkum ka NIRF Ratings ka la hiar sha ka thup ba hapdeng 101 bad 150 na ki 200 tylli ki university ba biang tam ha India. Ka NEHU ka la hiar kat haduh ba la tam ïa ka da kiwei ki university. Na ki jaka pule ba tbit eh ha ka thaiñ Northeast kiba wan sha khmat ki long ka IIT Guwahati ha ka kyrdan ba 9 bad ka NIT Silchar ba 92. Katba na ki University pat, ka Tezpur University ka la wan ba 69, ka Mizoram university ba 77 bud pat sa ka Assam University, Manipur University bad Dibrugarh University ha ka kyrdan ba hapdeng 101 bad150 bud pat sa ka USTM kaba dang shu seng ha u snem 2011 kaba la wan ha ki kyrdan ba hapdeng 150 bad 200.
Ym don kawei ruh u snem ba ka University kan lait na ka jingïakhih bad ka long kaei kaei kaba i noh mynsiem ban ïohi ba ka jingïakhih pat bunsien kam seisoh namar ka jingmynthi bad jingbym suidniew ki bor ba dei khmih bad pynïaid ïa ka University. Lah ban ong ba man la u snem kane ka skulbah kan mih ha ki khubor shaphang ki jingïakhih kiba ju pynlong da ki nonghikai, khynnah pule bad nongtrei ruh kumjuh. Haba ngi ïaid hapoh permanent campus tang na ka jinglong jingman ki surok bad ki jingtei la ithuh ïa ka jinglong torti ka rukom trei bad ka jingbym don jingkitkhlieh jong ki bor ba dei peit ban pynbha ïa ka University. Nalor kata bun phew tylli ki snem ngi ïohi ïa ki jingïakhih jong ki khynnah hostel kiba ju pynpaw ïa ki jingeh kiba bun ha ki jaka sah jong ki namar ka jingbym kitkhia jong ka University Administration. Na ka liang jong ki nonghikai ruh ki la ïakhih ïa ki mat bapher naduh ka rukom thungkam thungjam, ka jingpynïaid ïa ki department bad ka jingbym ryntih ha kiba bun ki liang. Ki nongtrei ki la ju ïakhih man ka por ban dawa ïa la ki hok ha kaba ïadei bad ka jingthungkam, ka jingsiew tulop, ka jingpynskhem ïa ki post bad kumta ter ter. Lehse dei na kane ka rukom long ka University ba ka sa hiar ka kyrdan.
Haba ngi peit ïa kine baroh ngi shem ba kawei kaba longpdeng ha kine ki jingjia kadei ka jingbym lerkam jong ki nongpynïaid bad ka jingleh donbor jong u khlieh jong ka University, u Vice-Chancellor (VC). Ka daw ba kongsan jong kane ka jingbym lah jong u ban trei ïa ka kam kumba la bynshet ha u ka dei ka jingrung palat ka kamsaiñ pyrthei ne ka politics ha kaba thung ïa ki post kiba donkam. Ka jingbym don u VC uba biang bad u bym don ka jingkitlhlieh na ka bynta jong ka University ne na ka bynta jong ki khynnah ba pule ha ka haduh ba ka la wanrah shibun ki jyrwit jyrwat ha ka rukom treikam ka University. Haba ngi peit ïa kane ka bynta, ngi lah ban ïohi ïa ka jingleh donbor ban pyntreikam jubor ïa ka NEP2020 kaba mynta ka la sdang ban ktah jur ïa ki khynnah pule, ki nonghikai bad ki nongpynïaid college. Lada ki khynnah ki duhnong na kane ka policy ka NEHU bad u VC uba mynta ki dei ban kitkhlieh ïa kaei ka ban jia ïa ki khynnah pule kiba la long langknia ha ka politik jong ka sorkar pdeng. Namarkata haba ngi peit ïa ka jingtreikam ka NEHU mynta, la donkam palat sa da kawei pat ka university kaba lah ban trei kat ka bor jong ka NEHU bad dei ha kane ka bynta ba ka jylla ka dei ban don la ka jong ka State University kaba pura.
Ha kine ki khyndiat bnai ba la dep ngi la ïohi ïa ka Sorkar MDA ba ka la pynkylla jubor ïa ka Captain Williamson Sangma Technical University sha ka Captain Williamson Sangma State University kaba la mang ban seng ha Balalgre, South West Garo Hills. Ngi khmih lynti ba kane ka University kan lah ban ai ka jingshakri kaba biang na ka bynta ki khynnah pule jong ka jylla. Tangba kumba long ki rukom treikam jong ka sorkar MDA1.0 bad MDA2.0, ki paidbah kim khmih lynti ba kane ka University kan ïaid beit kumba ka dei ban long ne ba kan kot kat kiwei ki University jong kiwei pat ki jylla, sa tang ka por kan batai ïa kata. Ngi lah ban sngewthuh ïa kane ka rukom treikam tang na ka jingkren jong u Myntri ka Tnad Pule Puthi u Rakkam A. Sangma uba la ong ba ki college ha Meghalaya baroh kin hap pynïasoh noh ïalade bad kane ka University ba thymmai. Lehse ngi lah ban ong ba kane ka jingkren bieij jong u ka dei na ka jingbym sngewthuh ïa ka rukom pynïaid ïa ka University ne ka jingbym ïohi jngai. Mynta hi baroh ki college ha ka jylla ki pynïasoh bad ka NEHU, hynrei ynda ka por ka la biang bad ka State University ka la tbit bha ka rukom treikam, lehse ki college kiba kwah pynïasoh bad ka kin sa jied hi ha kata ka por ban ïa don noh bad ka. Hynrei ïa mynta hi ka dang kloi palat ïa ki ba kin leit hi ne da kaba shah pynbor. Namar lada shu pynbor la sngewthuh shai ba kan sa ktah jur ïa ki college khamtam lada ki pyntreikam ïa ka NEP-FYUP kaba wat ka NEHU ruh ka dang shem shitom haduh katta katta ban pyntreikam ïa ka.
Ka University kaba thymmai kan nym pat lah satia wat tang ban peit ïalade ruh kumno kan pyrkhat ba kan pynïaid ïa ki college naduh ka rukom pynïasoh, ka jingshna ïa ka curriculum, ka syllabus, ka examination, jingpynbna result bad kiwei de ki kam kiba khia. Ha kano ka rukom kan pynïaid haba wat tang ïa ki Subject ki ban don ha ka University kan shim por ba yn pynskhem ïa ki ha ki Department kiba ki dei ban don. Nalor nangta kan hap ïaid ïa ka jingthung kam naduh ki nongtrei, ki nonghikai bad ka jingpynbiang nadong shadong katkum ki kyndon jong ka UGC bad ka jingdonkam ka juk ba mynta. Wat la ki jingeh ki bun bad kan shim por ban pynjanai ïa ka jingtreikam jong ka hynrei lada nang ban pynïaid ïa ka ha ka rukom kaba dei, kan long ka jingïarap shibun ïa ki khynnah pule, ki samla wad kam, ki nonghikai kiba la tbit bad ïa ka pule puthi ha ka jylla hi baroh kawei. Ha kiwei ki jylla, ki don ki State University kiba kham leh bha bad kham kiew ban ïa ki Central University bad kane ka dei namar kiba don ha ka tnad Pule Puthi jong ka Sorkar ki don ka jabieng ban trei bad ka mynsiem ban kyntiew ïa ka.
Ka sorkar Meghalaya ruh ka dei ban pynurlong ïa kata bad ka dei ban bud ïa ki nuksa ba bha na kiwei pat ki State University ha kylleng ka ri India. Kane ka rukom pyrkhat ban tei ïa ka State University kaba tbit da ka jingmut ban nym leh shiliang khmat, ka lah ban sdang da ka jingpynkylla kyrteng noh ïa ka na ka Captain Williamson Sangma State University sha ka Meghalaya State University kaba long ka kyrteng pdeng na ka bynta baroh. Bad ruh kumba kiwei ki State University ha kiwei ki jylla ki ai nam da ka kyrteng jylla jong ki hi. Kawei pat kaba lah ban kyntiew stet ïa ka State University ka long ban nym thung kam da kaba buhrieh ne ba don jingïadei bad ki briew ba don ha ka sorkar bad kan jin da la bha eh ba kiar na ka jingwanrah ïa ka kam saiñ pyrthei ha ka jingthungkam, treikam bad pynïaid ïa ka university. Nangta dei ruh ban don ki campus ba mar ïa ryngkat ka bor bad ka jingpynïaid kadei ban don ha nongbah shillong bad tura bad ki extended campus pat ki lah ban sa mih hadien lada i donkam ha kiwei pat ki headquarters jong ki District kylleng ka jylla. Kane kan ïarap shibun ïa ki samla pule ba kin ïoh lad ban pule post-graduate lane master degree ha ka state university kaba kaba don ha la ka jong ka District.
Ka jingpule ki khynnah samla ha ki kyrdan University level kan kiew bad seisoh lada ka rukom pynïaid ka biang bad lada ka don ka jingïatreilang hapdeng ka tnad pule puthi jong ka sorkar jylla, ki bor pynïaid university kiba don ha ka jylla, ka tnad pule puthi jong ka sorkar pdeng ryngkat ruh bad ki seng ba lum ïa ki khynnah, ki nonghikai bad ki nongtrei. Ki don bun kiei kiei kiba ngi lah ban ïatai ha kaba ïadei bad ka jingpule ha University level hynrei ïa mynta ngin ïa ieh shwa tang katne bad ngin sa nang ïathir pat hadien. Ngi donkam ban peit sa ïa kiwei ki bynta kiba ktah ïa ka pule puthi bad lada ka por ka ai ka lad ngin ïoh ban ïa bteng ïa ka jingïamir jingmut ha ka “Bynta kaba San.”
