Plie u bah Kyrmen Shylla ia ka Smart Interactive Classroom ha Little Star Secondary School

Khliehriat Jylliew 2: U myntri ka sorkar jylla, uba dei ruh u MLA jong ka Khliehriat, u bah Kyrmen Shylla, mynta ka sngi u la plie ïa kawei ka lad ai jinghikai sha ki khynnah skul, ka Smart Interactive Panel ha skul Little Star Academy Secondary School Khliehriat bad ki la don haduh shiphew tylli ki skul ha East Jaiñtia Hills District kiba la ioh ïa kum kane lad ban don ki smart Classroom kaban iarap ïa ki khynnah ha ka pule puthi kaba da ki kor ki bor lyngba ki internet jong ka juk tecnologhy.
Ia kane ka jingbuh ïa ki Smart Interactive Panel, la bei tyngka da ka District Mineral Funding, jong ki karkhana dewbilat kiba don ha East Jaiñtia Hills District kiba ha ka mang tyngka kaba T 1600000 (khathynriew lak tyngka), kaba na ka bynta ki kahtwei tylli ki tiar (set) kiba kynthup ka 65” Maxhub Interactive Smart Panel, ka Inverter bad ka Battery ha ki shiphew tylli ki skul.
Ki skul kiba la ioh ïa kane ka Smart Interactive Panel ki kynthup ka Tep Kyndait Government Upper Primary School (Tuber), ka Sutnga Government Upper Primary school, (Sutnga), ka Khliehriat Higher Secondary school, khliehriat, ka Sutnga Presbyterian Higher Secondary School, Sutnga, ka Dkhiah Presbyterian Secondary School, Dkhiah, ka Tluh Secondary School, Tluh, ka Sacred Heart Higher Secondary School, Lamyrsiang, Little Star Academy Secondary school, khliehriat, Musniang Secondary School, Musniang , kaTia Chaphrang Higher Secondary School, Sohkymphor bad ka Little Star Academy Secondary school, Khliehriat.
Haba kren kum u kongsan, u bah Kyrmen Shylla, u la pynpaw ka jingsngew kmen halor kane ka jingioh lad ki skul kiba ioh ïa kine ki Smart Classroom bad ong ba kane kan wanrah ïa ka jingkylla dur ha ka pule puthi namar ha kane ka smart classroom ki khynnah kim donkam ban mutdur ïa kaba ki nonghikai ki hikai hynrei lyngba ki screen kin iohi lut ïa kaei kaba hikai, u la kyntu ïa ki khynnah ba ki dei ban long kiba kohnguh ïa ki kmie ki kpa bad ïa ki nonghikai, ha kajuh ka por u la ai ka jingkhublei kitbok kitrwiang ïa ka skul Little Star bad kiwei kiwei ki skul kiba ioh ïa kane ka Smart Classrrom ba kin nang kiew shaphrang ha ka pule puthi.
U Deputy Commissioner East Jaiñtia Hills District, u Abhilash Banarwal, IAS, u la ong ba kane ka smart classrrom kan pynsuk bha ïa ki nonghikai bad ki khynnah skul namar hangne lah record lut ïa kaei kaba thoh, kan pynskuk ïa ka rukom shim class bad ban record online, kan pynskuk ïa ka online class bad kaei kaba don ha ki smart phone ka don lut ha kane ka screen ruh la ka dei ha kano kano ka bynta jong ka jingpule bad kane long ruh lyngba ki internet connection.
U Abhilash Banarwal, u kyntu ïa ki bor pyniaid skul ba ki dei ban pyntbit ïa ki nonghikai ba kin dup lah ban pynsngewthuh ïa ki khynnah ha ka por ba ai jinghikai bad u la shim ruh ïa ka bynta ban pyni ïa ka rukom ban hikai lane demonstrate.
Kiba la ai jingkren ki kynthup ruh, u DSEO East Jaiñtia Hills District, u bah L.S.Lyngdoh uba la ai ïa ka jingkren ai khublei.
Kiba la ia don ryngkat lang ki kynthup u Principal jong Khliehriat Higher Secondary School, u Fr Josh, ka Principal Little Star Acadamy Secondary School, ka kong Nina Vanichia S.Pala, ki nonghikai lem bad ki khynnah skul.