Kyntait ka Congress ban ïatrei lang bad kiwei ki party ha ka bye-election ha Gambegre

Shillong, Nailur 20 : Ka Congress kaba don ha ka Liang Pyrshah ha Ïing Dorbar Thawaiñ ka Jylla, ha ka sngi Thohdieng ka la pynpaw ba kam kwah satia ban ïatrei lang bad kino kino ki party ha kane ka elekshon shiteng samoi kaban long ha Gambegre constituency.
“Ha kane ka elekshon ban wan ngi la don la u jong u kyrtong. Ki TMC, NPP bad BJP ki lah ban don la ki jong ki kyrtong. Kumta kam don pat kano kano ka jingthmu ban ïatrei lang bad no bad no ruh na bynta kane ka elekshon ha Gambegre,” ong u President ka Congress ha Meghalaya, Bah Vincent H Pala haba kren bad ki lad pathai khubor.
Haba kren pat halor ka jingkam jong ka NPP ba ka Congress kan ym lah shuh ban ïoh biang ïa ka shuki MLA na Gambegre, utei u heh Congress u la ong, “Ïa ka elekshon ym pat pynbna. Hynrei ka ju long pat ba ha ka elekshon shiteng samoi kan don beit ka jingpyndonkam da ki bor jong ka sorkar bad kumta kane ka lah ban long biang….”
Lah ruh ban kdew hangne ba ka Congress bad ka BJP haduh mynta kim pat pynbna ïa ki kyrtong na bynta katei ka elekshon katba ka NPP pat ka la rai ba pynieng da ka kurim jong u Myntri Rangbah ka Jylla katba ka TMC ka la mynjur ban sei da ka MDC bad kurim jong u MLA barim ka Rangsakona.
Ka jingwan jong kane ka elekshon shiteng samoi ka dei hadien ka jingiehnoh jong u MLA ka Congress u Saleng A Sangma hadien ba u la shah jied noh kum u MP ka Tura Parliamentary Constituency dang shen mynta u snem.