Nongpoh, Nailur 20: Ki nongkyrshan bad nongïalam jong ka party United Democratic Party (UDP) Nongpoh Circle mynta ka sngi kila shim ïaka rai ban pynbna biang ïa ka kyrteng jong u Bah Balajied Ranee kum u kyrtong ka UDP ha ka elekshon MDC ban sa long na Nongpoh Constituency ha ka General Council jong ka party UDP Nongpoh Circle kaba la long mynta ka sngi ha Parish Hall Nongpoh.
Ha kane ka General Council la wan ruh ban shim bynta lang da u Bah Mayral Born Syiem, Bah Balajied Ranee Acting President ka UDP Ri-Bhoi ba dei ruh u MDC jong ka Nongpoh Constituency, u Bah Andrias Synkli President UDP Nongpoh Circle lem bad kiwei kiwei ki nongkitkam bad ki nongkyrshan ka UDP na Nongpoh Circle.
Ki nongkitkam jong ka party ki la pynshai ruh halor ka rukom treikam jong ka party ha kine ki khyndiat snem, lyngba ki nongmihkhmat hakhmat ki nongkitkam bad nongkyrshan na ki Primary Unit, ki Sub Circle bapher bapher.
Haba kren sha ki lad pathai khubor u Bah Andreas Syngkli President ka UDP Nongpoh Circle u la ong ba ha kane ka sngi kum ki nongkyrshan bad ki nongïalam ba hakhmat jong ka party ki la rai bad mynjur ban phah biang ïa u bah Balajied Ranee u ba dei ruh u MDC ba mynta ban long biang u kyrtong naka party UDP ha ka elekshon MDC ban wan namar kum ka party hi ka dang ibit ïa ka rukom treikam bad ka jingshakri jong u Bah Balajied Ranee ha Nongpoh Constituency.
U Bah Balajied Ranee u la ai ka jingkhublei sha ki nongkitkam bad ki nongkyrshan ka party kiba dang shaniah biang ha u ban bah ïa ka lyngkor kum u kyrtong ka UDP ha ka elekshon MDC ban wan bad kyrmen skhem ba ki paidbah ki shaniah skhem ha ka rukom treikam jong u bad ka party ba kin skhem ha ka nongrim bad khamtam ban sdang ban trei shitom na ka bynta ka elekshon ban wan khnang ba ka party kan ïoh ïa u soh ka jingjop.
