Ka kynhun myntri Cabinet jong ka sorkar NDA ba la lamkhmat da u Narendra Damodardas Modi mynta ka sngi 18.09.2024 ka la mynjur ïa ka jingtyrwa jong ka Committee ba la khlieh da u President barim ka ri, u Ram Nath Kovind kaba dei halor ka phang ban pynlong election tang shisien pynlong beit ha baroh kawei ka Ri India ba la tip kum ka “One Nation, One Election”. Ïa kane ka report la khmihlynti ban wanrah ïa ka sha ka Dorbar Tlang ka Parliament ka ban sa long shen hadien ba ka Ministry of Law kan da jurip bniah ïa ki khyrnit kiba don ha ka.
Hapoh jong katei ka Jingtyrwa, la ong ba ka Election kan long ryngkat ryngkat bad Lok Sabha bad ki Legislative Assembly ha baroh kawei ka ri India (Bharat). U Ram Nath Kavind u la ban jur ba ka jingthmu ban pynlong ha ka juh ka por ka long, ban pynduna ïa ka jinglut jingsep bad ban kham pynduh ruh na ka jngpynsyrwakai ïa ka por. Hynrei ka samoi te kan dei hi Sansnem.
Ka long kaba shisha ba u Modi naduh ba u la shimti kum u Prime Minister jong ka Ri naduh 2014 u phohsniew nalor kiwei pat ki agenda ban pynkylla ïa ka India sha ka Bharat, nangta kawei ka ri, kawei ka ktien, kawei ka niam. U la buh thong ruh ban pynlong Election ha kajuh ka por bad Lok Sabha bad Assembly. Dei namarkata ka daw la thung ïa ka High Level Committee
ha ka 25.10.2023 ha kaba ka Law Ministry ka la pynmih ïa ka Notification ba la khlieh da u Ram Nath Kovind (President barim ka Ri), Amit Shah,Adhri Ranjan Chowdhury, Ghulam Nabi Azad napdeng ki phra ngut ki dkhot jong ka.
Ka History jong ka One Nation, One Election, kat kum ka report ba 107 jong ka Law Commission ha ka snem 1999, ka la ai jingmut ban pynkut noh ïa ka rukom pynlong election man la ka snem, ka ong ban pynlong election kyrpang la ka jong ïa ki legislative assembly ka dei “tang ha ki khep bym lah kiar”.
Ka Law Commission ba 22 nd ha ka draft jong ka ha ka snem 2018 ka la tyrwa “ban pynlong lang” ïa ki election. Ha ka snem 2015, ka Parliamentary Standing Committee on Personnel, Public Grievances, Law and Justice ka la kubur ïa katei ka jingthmu ryngkat bad ki jingai jingmut ha ki katto katne tylli ki mat kiba lah ban ïa tyngkhuh. Ka report ba la ïoh jingkyrshan ruh na ka AIADMK, Asom Gana Parishad, Shiromani Akali Dal, Indian Union Muslim League nalor kiwei pat. Katba ka Indian National Congress, Nationalist Congress Party, Communist Party bad ka All India Trinamool Congress ki kyntait war ïa katei ka jingai jingmut kum ka jingpyrkhat kamkai bad ka bym shongnia ha ka synshar paidbah. Katba ha ka snem 2017, ka Niti Aayog ha ka jingthoh ka ai jingmut, ba ki arbynta ki election dei ban pynkylla nohtang sha kawei naduh ka snem 2019 jong ka Lok Sabha Election.
Hynrei to ngin peit, kiwei ki jingeh kiba katei ka Jingtyrwa bad jingmynjur jong ka Cabinet ka dang ïa tyngkhuh mawsiang ha ki jing ïaid lynti jong ka ?.
1. Ka Jingpyntreikam ïa katei ka Jingthmu, ka donkam ïa ka Constitutional Amendment kaba donkam la kumno kumno 2/3 bynta na ka jingbunpaid ha ka Parliament.
2. Ban pynlongkam ïa katei ka Jingthmu, donkam ban ïoh mar shiteng ka Jingmynjur (ratification) na ki jylla hapoh ka Ri.
3. Ka Jingpynbha (amendment) ïa ka E articles jong ka Art.83, Art.85 (2) Section (b), Art.174 (2) Section (b), Art.356 & 75 (3).
4. Nangta, donkam ban pynkylla ïa ka People Representation Act 1951.
Kumno ka Lok Sabha bad Legislative Assembly Election kin long lang ha kajuh ka sngi ne por ?.
Shu buh lada ka don ka rai paidbah (verdict) da ka House ka bym lah ban thaw sorkar mano mano (hung assembly) bad kum kita ki jylla ki bym dei ba synshar hi da ka BJP, kaei keiñ ka ban jia lada pyntreikam noh ïa ka Kawei ka Ri kawei ka Election ?.
Nalor nangta, hato ka sorkar kmie ka lah ne em ban pynbiang bor pahara (security) ha baroh kawei ka Ri lada long election ha kajuh ka por. Ha ka jing ïohi jong ngi, wat mynta ba pyllong election da ki pali (phase-wise) bad bun bun sngi tang ha kawei ka jylla khamtam ha ki jylla baheh kum ka Uttar Pradesh, Bihar, Jammu & Kashmir bad kiwei pat ki Jylla ba jur ka jingïa umsnam, yn ïoh bor pahara na ei ban pyn ïaid beit ïa ka polling, satnag ban pan bor pahara na ka UN Security Council.
Shuh shuh, lada ka Parliament kan mynjur ïa katei ka jingtyrwa, hato ka sorkar India ka lah ne em ban pynwai noh (dissolve) ïa ka pali jong ka Legislative Assembly shwa ïa ka por ba kan kut. Lane lah ne em ban pynjlan ïa ka samoi jong ka Legislative Assembly haba ka la kut khnang ban ïa ryngkat bad ka election Lok Sabha. Kum ka nuksa, ka Election Lok Sabha kan long ha ka snem 2029, katba ka Meghalaya kan kut ha ka snem 2028 bad kumta ter ter.
Kat kum ka Constitution jong ka Ri India, lah ban pynwai ïa ka samoi treikam jong ka Legislative Assembly sa tang lada la pynbna ïa ka synshar Emergency (Proclamation of Emergency), kata; lada don ka Thma ne kino kino ki kam pohïing kiba klang hapoh ka Ri. Kata ruh kat kum ka provision ba don ha ka Art. 174 , dei ban pynjlan sa tang shisnem naduh ba pynbna Emergency, lait nangta kam dei ban palat sa ïa ka hynriew bnai.
Hynrei ka jingkylli ka long, yn leh kumno ïa ki Legislative Assembly kiba dang ïaid tang kumba laisnem ei ei ka Samoi traikam. Ha ka provision aiu ban pynjlang ne ban pynwai noh ïa ka.
Lada ïa katei ka jingtyrwa jong ka High Level Committee ba la khlieh da u Ram Nath Kovind kan poi sha Parliament, ki MP kin hap ban shut jabieng bha ïalade ryngkat bad ki stad aiñ kumno
ban address ïa kitei ki jingeh lada pynlong election bad Lok Sabha bad Legislative Assembly ha kajuh ka por, namar lada ka long kumta, wat ka Samoi treikam jong ka Meghalaya Legislative Assembly ruh dei ban pynjlan sa shisnem hadien ka 2028. Wat la ngim lah ban tip than kaei ka jingmut ba shalyndet jong ka “One Nation One Election” hynrei u khnam te u thew beit hi sha kawei Ri, kawei ka ktien, kawei ka sorkar, kawei ka Niam (One Country, One Language, One Religion). Hangne ngi ïohi ba la kham pynsuki noh khyndiat ïa ka jingpyntreikam ïa ka Uniform Civil Code (UCC) dei namar ba ka BJP kam lah ban ïoh majority kumba la khmihlynti ha kane ka election MP ba dang shu dep.
Kane ka mat ka long kaba itynnad bha ban peitkai nalor Gallery, to ngin ïa ap shiphang por haduh katno ka sorkar NDA ka lah ban pynurlong ïa kane ka jingphohsniew jong ka, Kawei ka Ri Kaei Election, namar ban pynlong aiñ, ka donkam bha ïa ka jingkyrshan jong ka Liang Pyrshah,kumta ka game kan long kaba ktik jingmut bha.
