SHILLONG, Nailur 18: Ka NorthEast United FC mynta ka Sngi Palei kan wan ïuhkjat ha nongbah Shillong ryngkat bad ka Durand Cup Trophy ba la wanrah khnang na bynta ki nongkyrshan.
Kumta da ka jingkyrshan na ka tnat ïalehkai jong ka Sorkar jylla Meghalaya, ka Meghalaya Football Association (MFA), bad na ka Meghalaya Tourism, ka klob ka khot bad pdiang sngewbha ïa baroh ki nongkyrshan ban wan sakhi ïa ka Durand Cup Trophy mynta ka sngi (19 tarik Nailur, 2024) ha JN Stadium, Polo, Shillong.
Haba phai dien, ka NorthEast United FC ka la ïohrah ïa ka namlahduh hadien ba ka la lah ban pynliem ïa ka klob ba radbah na Kolkatta- ka Mohun Bagan Super Giant da 4-3 ha ka tie breaker hadien ba ïakhaid mar 2 kol ha ka por ba la buh ha ka jingïakhun final ba la long ha Vivekananda Yuba Bharati Krirangan, Kolkata.
Kane ka dei ruh ka khusnam kaba nyngkong ïa ka NEUFC hadien 10 snem ba la seng ïa ka ha ka 13 tarik ïaïong 2014.
Nalor ka jingpyni nam ïa ka trophy na bynta ki nongkyrshan kan don ruh ka Open Training Session jong ki player kane ka kynhun hapoh JN Stadium ha ka por 12 baje mynsngi, nangta ka jingïalang bad ki lad pathai khubor ban ïadon ryngkatlang u CEO jong ka klob – u Mandar Tamhane, u Juan Pedro Benali (Head coach) bad lai ngut ki player ba kynthup ïa u Redeem Tlang, Michel Zabaco bad u Parthib Gogoi
