Shillong, Nailur 18: Ka Meghalaya Football Association lyngba u General Secretary ka synjuk u Sunesh Syiem, ka la pynbna ba shen kan sa ïoh ban pynlong ïa ka samoi ïalehkai kaba saw jong ka lympung Meghalaya State League, ha kaba la pynbiet ban sdang ïa ka ha ka 26 tarik u Risaw.
Mynta ka samoi ki kynhun ba kynsai na ki district bapher bapher ba la ïasoh bad ka MFA yn phiah ïa ki hapdeng hynriew tylli ki thup lane Group, ban kynthup mar saw tylli ki kynhun ki ban ïakhun ïa ki jingïalehkai round robin ha ki hynriew tylli ki jaka ha kylleng ka jylla, ïa ki jingtip ba kham bñiah yn sa nang pynpaw ha ki sngi ban wan.
Kawei pa kawei ka kynhun lahduh na man ki group ryngkat bad ar tylli ki kynhun ba kham kynsai kiba poi kyrdan ba ar na kine ki hynriew tylli ki Group kin ïohrung sha ka wat ïakhun Quarterfinal. Kane ka kdew ruh ïa ka jingkylla haba nujor ïa ki lai tylli ki samoi lehkai ba mynshwa, ha kaba ki lahduh na man ki Group ki ïoh rung beit beit sha ka semifinal, hynrei mynta ka kynti ka la wanrah sa ïa kawei pat ka wat ïakhun ka ban nang pynshongshit shuh shuh ïa ka lympung.
Kumban shu pynkynmaw, ka Rangdajied United FC ka la ïohrah ïa ka namlahduh hadien ba ka la pynliem ïa ka Khliehmawlieh Youth Club ha ka jingïakhun final ha ka samoi ba ladep, bad mynta ka samoi kan hap ban ïada ïa ka burom.
U Sunesh Syiem u la pynpaw ruh ba ki jingïakhun group stage ba khadduh jong ka Meghalaya Youth League na bynta ka U-14 bad U-16 yn pynkut ha ka 28 tarik mynta u Nailur. Ka quarterfinal kan sdang naduh ka taïew ba nyngkong jong u Risaw, bud sa ka semifinal bad ka final ban pynlong ha ka 11 tarik u Risaw. Baroh ki jingïalehkai ha ka knockout yn pynlong ha Shillong.
Baroh ar tylli ki lympung ïalehkai la kyrshan da ka sorkar jylla Meghalaya.
