Hiar u ADC ban jurip ïa ka jingpyrshang kyntur pud biang ka Assam ha ka thaiñ Langpih

Nongstoiñ, Nailur 17: “Ka jingshlur jong ka sorkar Assam ban pynbiej da ki song pynroi bapher bapher ha khappud ka West Khasi Hills, ka dei namar ka sorkar Assam ka ïohi ïa ka jingbym lah ka sorkar Meghalaya, ban theh bad pynpoi ïa ki kam pynroi ha ki shnong ka thaiñ Langpih”, ong u President ka KSU Ri Muliang u samla Biangboy Sangriang, haba kren sha ki lad pathai khubor ha ka sngi ba ar, hadien ba la wai ka jingïalang jong ki saw tylli ki bor synshar shnong ryngkat ki bor District, kaba la long ha ka shnong Nongma.
U la ong ba ka seng ka la sakhi da la ki jong ki khmat ka la lap bad sakhi ïa ka jingshah iehbeiñ jong ki paidbah khappud ha ka sorkar Meghalaya. Kata la ka long ha ki surok, ki jaka sumar, pule puthi bad kiwei kiwei.
U la ong kynthoh ruh ïa ka sorkar jylla ba balei ka ieh beiñ bad leh meinah ïa ki shnong khappud. Ha ka jingshisha ka sorkar ka la dei ban peit kyrpang bad kner ki lad jingïarap khnang ba kan long ka jingmyntoi na ka hynta ki paidbah nongshong shnong.
Ha kajuh ka por u la maham ruh ïa ka sorkar Assam ba kam dei ban pyndik ïa ki paidbah, namar haduh mynta ka jingïakren pynbeit pud da ki ar sorkar ka dang ïaid shakhmat. U la ong ruh ba lada ka sorkar Assam ka ïai leh donbor, ka KSU ruh kam salia ban ïakhun pyrshah ban ïada ki paidbah kiba long ki paradoh parasnam kiba don ha ka thaiñ khappud.
Lah ban pynkynmaw ba kane ka jingïalang ha Nongma ki bor District bad ki bor shnong ha ka sngi ba ar, ka dei hadien ba ki briew ka sorkar Assam ha ka 11 tarik Nailur 2024, ki la wan kiew sha ki saw shnong kata ka Nongdronpara, Nongma, Nongmawlein bad Nongsohram, na ka bynta ban sorjamin bad thmu ban shna surok.
Na ka liang u Bah M.A Challam ADC ryngkat ki katto katne ki heh pulit, ki la hiar ha ka sngi ba ar ban jurip dalade ha ka shnong Nongma bad sngap ïa kaei kaba ki nongshong shnong ki ai jingtip halor kane, khamtam na ka bynta ban pyntikna ruh ïa ka shongsuk shongsaiñ ki paidbah.
Na ka liang u ADC u la lum ruh ïa ka jingïalang ha dorbar hall shnong ryngkat u OC ka Langpih Out Post, nangta ki nongïalam shnong, ki dkhot ka KSU West Khasi Hills kiba la dep ujor ruh sha u Deputy Commissioner halor kane ka jingjia ha ka sngi nyngkong jong ka taiew.
Haba kren ha ka jingïalang na ka liang u ADC, u la ong ba ka ki heh sorkar ryngkat ki pulit na Assam, ka dei kaba ki shu wan kynsan khlem pyntip sha ki bor District ka West Khasi Hills lane sha ki sordar shnong. Na ka liang ki bor District kin sa wad jingtip halor kane bad ban pyntip ruh sha u DC jong ka Kamrup.