La kut ka jinghap soi kot ki Syiem ki Sirdar ha khmut kali, da ka ophis ai ka KHADC

Shillong, Nailur 16 : Ki Khlieh Nongsynshar jong ki Hima, ki Elaka bad Wahadadar nangne shakhmat kim donkam shuh ban soi kot soi sla ha khmut kali lane ban ïa kren kam ha baranda jong ka District Council namar na ka liang ka KHADC ha ka sngi Nyngkong ka la ai da ka kamra treikam la ka jong na bynta jong ki.
Ïa kane ka kamra kaba long kum ka kynja ophis treikam kaba don ha District Council hi, la aiti da u CEM bad Deputy CEM ka KHADC ha ka jingïalang kaba lyngkot kaba long hynne ka sngi ha ryngkat ka jingdonlang jong baroh ki Khlieh Nongsynshar kata naduh ki Syiem, ki Sirdar, Wahadadar jong ki 54 tylli ki Hima/Elaka/Confedaracy kiba hap ha u pud u sam jong ka Council.
Shwa kane, na ka liang u Syiem Khynnah ka Hima Nongkhlaw, ‘Paiem KM Syiem u la ong, “Baroh shi katta lada donkam ban soi kot ngi hap ban pynshah ha khmut kali (bonet) hynrei mynta pat ngi la ïoh la ka jong ka kamra treikam kaba kyrpang. Ngi pynpaw ka jingsngewnguh kaba khraw ïa u CEM bad Deputy CEM kiba la pynsngap ïa ka jingkyrpad jongngi,” u la ong.
Lah ruh ban kdew hangne ba kadei ka sien kaba nyngkong eh ha ka histori jong ka District Council ba kan ai ka jaka treikam lane ka ophis kyrpang ïa ki Khlieh Nongsynshar hapoh ka ophis treikam jong ka Council hi.
Haba kren ha kane ka sngi, u CEM u la ong ba ka jingai jong ka Council ïa katei ka ophis treikam ka long ban pynsuk ïa ki Syiem, ki Sirdar, ki Lyngdoh, ki Sordar, ki Wahadadar haba ki donkam eiei ha KHADC. “Mynta lada ki wan donkam ha KHADC lane ha nongbah Shillong kim donkam shuh ban shu ïeng ha baranda ne sha phyllaw jong ka Council hynrei ki la don ka ophis treikam kaba ki lah ban pyndep ïa ki kam baroh,” ong u CEM.
Shuh shuh u la pyntip ba na bynta ban pynsuk ïa ki, ka Council kan buh ruh uwei u nongtrei khnang ban ïarap haba ki donkam ei ei.
U CEM u ong ruh ba kane kan ïarap shuh shuh ban wanrah ka jingtreikam kaba kham jan shuh shuh hapdeng ka Council bad ki Khlieh Nongsynshar kiba don kajuh ka thong ban pynneh pynsah ïa ka riti dustur, ka kolshor bad ruh ïa ka khyndew ka shyiap.
Ha kane kajuh ka sngi, saw tylli ki Hima kiba don ha khappud bad ka Meghalaya – Assam, ba kynthup ïa ka Hima Jirang, Nongspung, Nongkhlaw bad Hima Mylliem ki la ujor sha u CEM ka Council, Bah Pynïaid Sing Syiem ba ka jingkyntur pud na Assam ha ki jaka ba don ha khappud kam pat sangeh satia.
Halor kane, na ka liang u CEM u la pyntip ba ïa kane ka kam la bynshet ha u Deputy CEM, Bah Pynshngaiñ N Syiem ba dei peit ïa ka tnad Elaka bad ka tnad Aiñ ban bishar bniah.
Katba na ka liang u Deputy CEM pat u la ong ba shen un sa khot ïa ki ophisar ban ïa syllok halor kane ka mat bad kumjuh ruh ïa ki stad aiñ.