Shillong, Nailur 14: Kan long ka khubor kaba phylla ha kaba ki shipai ba dang don ha ka kam bad kiba la shongthait (ESM) na ki Jylla ka thaiñ shatei lammihngi (North East) ka Ri India ki la wanrah ïa ka burom kaba khraw ïa ka jaitbynriew lyngba ka jingshakri ka jong ki ha ki kam bapher bapher.
Kumta ha kaba ïadei bad kane kum ka jingai jingithuh ïa ki jinglenlade lyngba ki jingdonkam ba kyrpang jong ki riewshlur jong ki Jylla ka thaiñ shatei lammihngi, la pynlong ïa ka Rajya Sainik Board Director’s Conclave (RSBDC) kaba ar sngi ha Shillong da ka HQ 101 Area.
Ha ka Conclave la ïakren shaphang ki mat kiba kongsan kiba ïadei bad ka jingbha jingmiat jong ki shipai rangbah, kynthup ïa ka SPRASH (System for Pension Administration Raksha), ka ECHS (Ex-Servicemen Contributory Health Scheme) bad kiwei ki lad jingmyntoi.
Ha kane ka prokram ki jingïakren ki long ban pynbha ïa ka rukom treikam jong ka bha jingmiat jong ka ESM, kaba la pynbeit katkum ki jingdonkam ba kyrpang jong ka thaiñ shatei lammihngi.
Ki heh ophisar kiba wan shim bynta ha ka Conclave ki kynthup, u Secretary jong ka tnat Ex-Servicemen Welfare, u General Officer Commanding (GOC) jong ka 101 Area Shillong, u Pension Comptroller of Defence Accounts (Prayagraj), bad ka Directorate of Resettlement ha ryngkat bad ki Director na ka Rajya Sainik Ki Board jong ki jylla jong ka thaiñ shatei lammihngi.
Shuh shuh ha ka jingïalang la pyrshang ban ithuh ïa ki jingeh ba kongsan bad ban thaw ïa ki lad ki lynti kiba lah ban leh ban kyntiew ïa ka jingbha jingmiat jong ka ESM ha kylleng ka thaiñ shatei lammihngi.
