Shillong, Nailur 14: Ka khubor ba la ïoh na ki pulit la ïathuh ba u Prithu Jhunjhunwala u la phah ka jingujor ba ha ka 9 tarik mynta u bnai, ki runar bym lah ban ithuh ki la tuh ïa ki tiar light napoh ka ïing sah jong u kaba ha Polo, Shillong.
Ha kawei pat ka jingjia ki pulit ki la ïathuh ba u Abiel Brandon Rapsang u la phah ka jingujor ba ka step jong ka 12 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar ML-05AD-0899, kaba la pynïeng harud surok ha Mawlai Nonglum, Shillong.
Shuh shuh na ka liang jong ki pulit ki la ïathuh ba u Bah Wanbhakupar L Nonglait, Organising Secy., KSU, West Khasi Hills District u la phah ka jingujor ba ha ka 11 tarik mynta u bnai ha ka por kumba 6 baje janmied, u la shem ba ki runar ki la rung da ka bor hapoh ka ophis jong ka KSU kaba ha New Nongstoiñ (WKH) bad ki la tuh ïa ka TV set, inverter battery, mobile phone, bad kiwei kiwei.
