Ki paidbah mynta ki la sian bha ban jied kyrtong bad ïa kano ka party, ym long ban leh kyrkieh : Congress

Shillong, Nailur 12 : U Working President jong ka Meghalaya Pradesh Congress Committee, Bah Pynshngaiñ N Syiem u la ong ba kum ka party hi kim kwah ban leh shlur palat lane ban leh kyrkieh ha kaba ïadei bad ki kyrtong na bynta ka elekshon MDC kaban sa long shen khamtam eh ha KHADC.
Une u nongïalam Congress ba dei ruh u Deputy Chief Executive Member ka KHADC u la ong ba mynta ki ïohi ba ki paidbah ki la kham sian bha kumno ban jied ïa ki kyrtong bad ïa ki party bad dei na kata ka daw kum ka party kim kwah ban leh kyrkieh haba ïadei bad ki kyrtong.
“Ngim kwah ban leh kyrkieh haba ïadei bad ka jingjied ïa ki kyrtong namar ngi la ïohi ba ki paidbah ki la stad bad ki la sian bha kumno ban jied ïa ki kyrtong bad ruh ïa ki party,” u la ong haba kren bad ki lad pathai khubor.
Da kaba pynpaw ba kum ka party ki don hi ka thong ban pynieng na baroh 29 tylli ki constituency jong ka KHADC hynrei ki hap ban da bishar bniah bha shwa ïa kane ruh kum ka National Party.
“Ngi hap ban da bishar bniah bha thik pa thik shwa ba ngin rai la kadei ba ngin pynieng tang 8 ngut, 15 ngut, 20 ne 29 ngut ruh,” u bynrap biang.
U Bah Pynshngaiñ u la ïathuh ruh ba hadien ka jingmih noh jong ki lai ngut ki MLA Congress, kumjuh ruh ki MDC kiba phet noh na ka party kumta kam dei satia ka kam kaba suk ïa ki nongïalam ka party ban rai kyrkieh.
“Ka daw hi ka long haba ngi pynieng ïa kino kino ki kyrtong ki dei ban don ka jingkyrmen ban jop bad kaba ar ka jingïoh vote kam dei satia ban duna than namar lada duna kan ktah ruh ïa ka party.”
Shuh shuh u la ïathuh ba haba ïadei hi bad ki kyrtong ki lah wat ban ïaid da ka kylla (phase) la ka long da ka phase 1, phase 2 lane phase 3 ruh.
La ïathuh ruh ba haduh mynta na ka liang ka party kam pat pynmih ïa ka jingpynbna na ka bynta ki kyrtong ba kin wan aplai tiket. Tangba u ong ba kum ka party kaba la don lypa ki shnat treikam ha man la ki block, kumta kam don jingeh na ka bynta ki kyrtong.
“Tangba hap ban da bishar bniah bha ïa ki, watla ngim artatien ba 7-8 tylli ki constituency la don lypa ki kyrtong kiba biang bad don jingkyrmen ban jop hynrei ngim pat ong ei ei ïa myntan namar ngi dang hap ban peit shwa ia ka jinglong jingman,” u la ong.
Kumba long mynta hi, ka KHADC ka don sa tang arngut ki MDC, kata tang u Bah Pynshngaiñ bad u Bah Ronnie V Lyngdoh, MLA bad MDC ka Mylliem.