Khliehriat nailur 12: Kawei ka trok kaba kit rubber katba ka dang iaid ha surok National Highway ha East Jaiñtia Hills District ka la kem ding kynsan bad ingkhong lut ploiñ bad kane ka la jia mynta ka step ha surok NH ha Umtyra, la suba ba ka jingkem ding katei ka trok ka dei namar ba la khluit palat ki shaka (tyre) bad sa kem ding sa ka body baroh kawei.
Ka kali pynlip ding ruh mar mar ka la poi sha Umtyra ban tehlakam ïa ka jing klang ka ding haduh ba la lah ban pynlip ïa ka ding, ha kane ka jingjia ym shym la don kano kano ka jingjia ba sngewsih ha kaba uba ñiah ïa ka trok bad u nongbud ki lait na ka jingmynsaw katba ka kali ka la ingkhong lut ploiñ .
