Kitbok u Dy CM ïa u Steve Jyrwa ban jop ai jingïarap 50 hajar tyngka kular pynïakynduh ïa u CM

Shillong Nailur 11: U Symbud Myntri Rangbah ka jylla u Ma Sniawbhalang Dhar, mynta ka sngi Balang, ula kitbok kitrwiang bad ai jingïarap 50,000 tyngka ïa ka kmie jong u Steve Jyrwa, uba ïashimbynta ha ka jingïakob shad ba la tip kum ka India Best Dancer season 4 ha nongbah Mumbai.
U Ma Sniawbhalang Dhar ula aiti ïa katei ka pisa ha ka kmie jong u Steve Jyrwa, ka Kong Bibi Jyrwa ha kaba la ïadonlang ki bahaïing bahasem bad u President ka All Meghalaya Dancers Association (AMDA) Bah Kitbok Thabah.
U Ma Sniawbhalang ula kitbok ïa u Steve uba la rung sha ka Top 6 jong katei ka jingïakob ba yn lah syndon ban rah ïa ka nam lahduh ha katei ka jingïakob shad hapoh ka ri ban wanrah nam bad burom ïa ka jylla bad ïa ka jaidbynriew.
Nalor kane, ula kyntu ruh ïa ki paidbah nongshong shnong ka jylla ba kin kyrshan ïa u Steve da kaba ïashimbynta ha ka jingthep vote khnang ba u Steve un ïoh ïa ka jingjop ha katei ka jingïakob shad.
Ula kular ruh ïa ki kmie ki kpa jong u Steve ba un pynïakynduh ïa ki bad u Myntri Rangbah ka jylla Conrad K Sangma khnang ba na ka liang ka sorkar jylla ruh kan ïoh ban ïarap na ka bynta ban pynsaphriang ïa ki jingtip sha ki paidbah ka jylla ba kin kyrshan lem ïa u Steve ha katei ka jingïakob.
U Bah Kitbok Thabah ula ong, kaba kongsan eh mynta ka long ïa ki paidbah ba kin thep vote ban kyrshan ïa u Steve ba yn poi sha ka thong namar kumba long, ka jingkhlaiñ jong u Steve ka dei na ka jing\ïoh point na ki nongbishar hynrei lada u Steve u khlaiñ sa ha ka jingïoh vote un dang lah ban jam shaphrang ban poi syndon sha ka Grand Finale.
Ula kyntu ïa ki paidbah ba kin kyrshan lem ïa u Steve ba un poi sha ka thong jong ka jingjop bad ba kin ïashimbynta ha ka jingthep vote ha ka Sony LIV App lyngba ka Google Play Store bad na kawei ka Account lah ban vote haduh 50 sien ban pynthikna ba u Steve un long u lahduh ha ka India Best Dancer Season 4.