Shillong, Nailur, 11: Ka Khasi Authors’ Society (KAS) ha ka sngi Balang ka la rakhe ïa ka lyngkhuh ba 45 snem da kaba ai khusnam ïa ki samla kiba pas bha ha ki jingpule bapher bapher katkum ka jingtbit, nangta la pynlong ruh ïa ka lympung mir jingtip bad pyllait ïa ki kot thymmai da ki dkhot ka seng.
U MP ka Shillong Dr. Ricky A.J Syngkon, uba la long kum u Kongsan u la kren ïa ki mat kiba ïadei ban kyntiew ïa ka thoh ka tar, khamtam ha kaba ïadei bad kaba pynrung ïa ka ktien Khasi ha ka Khyrnit Baphra jong ka Riti Synshar ka Ri India.
U Dr. Syngkon u la ban jur halor ka jingdonkam ban pynneh ïa ki ktien shnong na kylleng ki thaiñ ha ka jylla ban pynriewspah ïa ka ktien pdeng bad kyntu ruh ban kiar na kaba pyndonkam da kiwei ki ktien mynder.
Ha kaba sdang la ai jingkren lamphrang da u President ka KAS, u Dr. D.R.L Nonglait uba la batai sani ïa ka lynti ïaid jong ka seng ha ki sawphew snem tam na ka bynta ban kyntiew ïa ka thoh ka tar bad ïa ka ktien Khasi sha ki kyrdan ba kongsan ha Ri India bad ha satlak pyrthei.
La ïathuh da u Dr. Nonglait ba ka KAS ka la pynïar hynñiew tylli ki shnat ha jylla bad lai tylli ha kylleng ka Ri India, kum ha Delhi, Bangalore bad Kolkatta.
U u la kdew ruh ba ki salonsari ba don ha jylla ruh ki la kynthup ïa ka jingpule ïa ka thoh ka pule Khasi ha ki kyrdan kiba hakliar haduh ka Ph D.
Ha kane ka sngi rakhe lyngkhuh snem la sam khusnam sha ki khatwei ngut ki samla kiba tyngshaiñ ha ki jingpule ha jylla kiba kynthup ïa ka Ribahunlang Lamarai, Ïalammiki Lamare, Josiah Duncan Lyngdoh Mawphlang, Claudia Aurelia Khyriem bad Abigail Ioanna Suchiang kiba la kiew irat ha ka SSLC bad ICSE.
Nalor kine la sam khusnam ruh ïa u Pynbha Lynshiang, Menangmankhraw Kharkongor, Ferry Filarisha Wann, Ritilian Diengdoh, Ar Meker Marpna kiba kiew irat ha ka HSSLC bad Badaker Nengnong Daloi ha ka BA.
Kum shi bynta ban rakhe ïa ka lyngkhuh snem, la pyllait lai tylli ki kot jong u Bah Hamles Mylliem Umlong ka ba la jer Ka Antigone, ka kot shaphang ka Kheiñkur Kheiñkha Khasi da u Bah Raphael Warjri bad ka kot shaphang ka riti mawbah mawbynna, ‘The Megalithic Culture of Khasi Jaiñtia Hills da u Dr Marco Babit Mitri.
Ïa kine ki kot la pyllait paidbah da u u Dr. Ricky A J Syngkon ryngkat ki kynrem lyndan ha rynsan ba kynthup ïa ka Kong Silbi Passah, u Bah Spiton Kharakor, Pa’iem Laborious Manik Syiem, ka Dr. Eureka Lyngdoh kaba long ka Principal jong ka Sankardev College, u Dr D.R.L Nonglait, Dr R.P Kharshiing bad u Bah K D Ramsiej.
Ha ka kylla sngi ka la pynlong sa ïa ka lympung mir jingtip ba la kren da ki dkhot rangbah ka seng bad uwei u samla ïa ka phang jong ka Shillong- Mynnor Mynta bad Lashai.
Ki kynrem lyndan ba kren ha ka lympung mir jingtip ki long u Dr Desmond L. Kharmawphlang, Dr Soloni Bareh, Bah Kitbor Nongrum, Bah Phrikshon Kharshiing ha ka kylla step bad ki kynrem lyndan ha ka kylla sngi ki long u Dr Kynpham Sing Nongkynrih, Bah Wansoon Kharkrang bad u samla W Norbert S Jana Nongbet.
